La presentación, esti sábadu pasáu, del llibru de rellatos «Cronicas de la Marca del Este» na llibrería Central de Xixón, resultó mui prestosa. Na semeya qu’acompaña esta pequeña notina, apaecemos Rubén Serrano, l’antólogu; la escritora Loli González Prada y esti qu’escribe. Falóse del llibru, claro, pero tamién de la importancia de la épica na lliteratura universal, y de cómo entovía tien un papel importante como defensora d’una riestra valores que tán principiando a perdese: l’amistá, el compañerismu, l’esfuerzu, el valor (físicu y moral), la defensa d’unos principios o unes causes… y too ello xunto colos condimentos perguapos d’aventura y fantasía. La xente qu’acudió a la llibrería, que tamién participó del coloquiu, paezme que salió con bon tastu na boca. Talo que nosotros.
