Va un tiempu, munchu, la Navidá yera una época de regalos. Meyor dicho, yera LA ÉPOCA los regalos. Los Reyes Magos veníen d’Oriente pa traenos dalgunos daos a los neños, un llibru, una pelota, un mecanu… Los más afortunaos una bicicleta. Y pa los mayores una corbata, un frascu colonia, o dalguna cosa util de la que teníen necesidá pa la vida diaria. LLegó llueu, importáu de tierres fríes, un paisanu barrigón y barbudu llamáu Papá Noel, y los regalos duplicáronse o repartiéronse, según les condiciones económiques de les families. Eso duró unos cuantos años. Pero la sociedá de consumu y un llixeru repunte salarial empuxó a dir espurriendo unes feches y otres onde había que regalar y regalar. Gastar, consumir, dilapidar. Y eses feches fueron apilándose, amontonándose unes enriba d’otres, faciendo una llinia continua d’ufiertes y compres que ye lo que tenemos agora n’España y supongo que n’otros munchos sitios. El regalu perdió, al mio modestu talantar, la importancia unívoca que tenía. ¿Quier esto dicir que dexaron de prestanos, que nun los agradecemos? Claro que non. Pero eso ye otra cosa.
Llega, agora, a les mios manes un llibru que ye, en sí mesmu, un verdaderu regalu. Como los antiguos. Trátase d’una antoloxía poética ilustrada que lleva por títulu: «Vientos verdes». Títulu tomáu d’un guapísimu poema de la poetisa arxentina Alejandra Pizarnik: «Niña que en vientos grises/ vientos verdes aguardó». El llibru atropa a un grupu de trenta y ocho voces poétiques femenines, de tiempos mui estremaos, que van dende 1892 con Alfonsina Storni y 1898 cola gran Concha Méndez, muerta nel esiliu mexicanu, hasta les más modernes ñacíes ya metanes el sieglu XX y que viven y escriben pa mayor gloria de les lletres d’anguaño. Ente elles una guapa representación del nuestru País: Lourdes Álvarez («Voluntá d’andarina»), María Rosa Serdio («Simple regalo»), Berta Piñán («Sudín, 7 años, territoriu del Kurdistán, Irán») o Olvido García Valdés («Algunas piedras»). Inclúyense nel llibru dalgunes escritores yá consagraes, como Carmen Conde, Ernestina de Champourcín, Gabriela Mistral, Gloria Fuertes… Y otres de les que yo nun tenía conocencia pero de gran altor poéticu. La escoyeta de los poemes, fechu por componentes de l’Asociación Genealogías, nun sé si se diz a les clares, pero paez empobinada pa rapazos, o llectores primerizos, qu’esfrutarán abondo de la calidá y cenciellez de los poemes y que seguro que los arrastrarán al contautu cola poesía y a siguir afondando nestes o otres autores. Ye mui prestoso tamién la variedá de llingües que desfilen pente les páxines del llibru. Asina podemos lleer -cola torna correspondiente- poemes en castellán, en catalán, en galego, n’euskera… y n’asturianu, completando’l ciclu llingüísticu peninsular (perdón, faltaríen el portugués, l’aranés y l’aragonés) y demostrando que la bayura llingüística ye siempre una riqueza y que a ver cuando diaños faen a la nuestra llingua oficial, que vamos palmar ensin poder velo, pa vergoña de los nuestros políticos.
Pero’l regalu ye entá mayor porque, al llau d’este grupu seleutu de poetes, hai otru grupu, non menos seleutu, d’ilustradores. Otres trenta y ocho muyeres que completen, o meyor, que complementen, los poemes incluyíos, dándo-yos un toque de color y sensibilidá que llogren que cada poema seya, en sí mesmu, una pequeña obra d’arte. Hai nomes yá consagraos, anque, por desgracia, la ilustración sigui siendo la hermana probe de los llibros, pues hasta va pocu tiempu malpenes si figuraben al llau de los autores del testu, cuando son una parte importantísima d’ellos. Prestóme muncho, tamién, ver ente elles a dalguna de les que m’acompañó en llibros míos. Asina, están Begmont, que m’ilustró «Deva y yo», Ilemi Cuesta Mier, que dibuxó les perguapes imáxenes de Xosefa de Xovellanos nel llibru que compartimos, o Inés Sánchez Nadal, que fizo lo propio con «Páxines del diariu de Simón». Por cierto, qu’Inés tuvo’l detalle de citame nel textu qu’acompaña a la ilustración, colo que, ensin sabelo, soi l’únicu paisanu qu’apaez nun llibru nel que too son rellumantes muyeres. Tien la so gracia. Como sería imposible citar a toles poetes y a toles ilustradores, encamiéntovos la compra del llibru que seguro que ye una regalu «de los d’antes» pa vosotros o p’aquellos a los que queréis.
Con esti llibru la editorial Pintar-Pintar cumple 20 años. Abúltame que con unos resultaos magníficos en cantidá y en calidá. Puen tar arguyosos del llabor fechu. Norabona.
Pienso mesa y digo silla,
compro pan y me lo dejo,
lo que aprendo se me olvida,
lo que pasa es que te quiero.
Gloria Fuertes
Nel barru,
dende la neñez,
punxi les manes.
Amasélo con tientu,
dándo-y forma a una casa
con fueyes y con paya,
voluntá
d’andarina, en toles
primaveres.
Lourdes Álvarez
