Esti mes de mayu cellebróse -esautamente’l xueves 17- el Día Internacional escontra la Homofobia. La fecha nun ta escoyía al debalu, correspuende al aniversariu del mesmu día de 1990 en que l’Asamblea Xeneral de la Organización Mundial de la Salú suprimió a la Homosexualidá de la llista de les enfermedaes mentales. Un reconocimientu mui tardíu pero que, con eso y con too, nun sirvió pa que nun siga habiendo paises y persones que faen de la homofobia la so bandera. Asina, entovía hai llugares en que la condición d’homesexual, transexual o bisexual ye condergada cola pena de muerte, y en munchos paises en que ye «tolerada», eses persones son marxinaes o señalaes de dalguna forma.
Poro, ye bienvenía la intervención pública del Presidente de los EE.XX. nel sen d’apautase, si bien a nivel personal, cola defensa del matrimoniu homosexual con iguales drechos que’l matrimoniu hetero. Fízolo, amás, d’un mou cenciellu, ensin grandes xestos grandilocuentes y abúltame qu’ello fue muncho más efeutivo. Al tiempu, el que va ser el so contrincante na llucha pola presidencia, quedó «retratáu» al descubrise que de mozu tuvo delles actuaciones homofóbiques. Dalgunos dicen que la declaración d’Obama fue mui pensada, tratando de ganase a determinada estaya
del ellectoráu. Nun m’importa. Siempre que de l’actuación personal d’un políticu se deriven consecuencies positives, dame igual que seya por un motivu o otru. Si él tamién se beneficia, meyor pa toos. Pero’l favor que fizo a la causa de la homosexualidá fue mui grande.
Llamentablemente equí n’España nun podemos dicir lo mesmo. La influencia, negativa siempre, de la xerarquía católica nesti tema trespasa les llendes de les creencies (que puen ser respetables), pa inxertase nel planu social con unes declaraciones impropies d’un país civilizáu. Esi ye’l casu, claro, del yá famosu obispu d’Alcalá, Reig Pla, qu’asoció homosexualidá con prostitución y con determinaes ideoloxíes «que corrompen a las personas». La normal protesta de los coleutivos de gays y lesbianes, y d’otres persones y estamentos sociales, fizo que’l restu la xerarquía, encabezada pol propiu Rouco Varela, zarrare files al rodiu del obispu calumniador (pues una calumnia ye lo que dixo) apelando, na menos, que a la declaración de los derechos humanos (ver, por exemplu, «El País» del 19/5/12). ¡Manda madre, hai que tener la cara dura! Mención aparte pal «nuestru obispu», Sanz Montes, siempre «a la vanguardia del retrocesu», que saltó en defensa del so colega apelando a los lobbies de gays y lesbianes. Por desgracia pa nós, los únicos lobbies qu’hai n’España visten traxe talar y alzacuellu. Esos si que tienen poder…Y si non, namás abasta con ver cómo consiguieron quitar los temes que nun-yos gustaben na asignatura de «Educación pa la ciudadanía». Ente otros, precisamente, el de la homofobia.
Tou esti baturiciu nun llogró tapecer la noticia del conocimientu pal gran públicu, de la persona que fue’l gran amor de Federico García Lorca: Juan Ramírez de Lucas, a quien el poeta-y dedicó los sos «Sonetos del amor oscuro», y col que tuvo a puntu de colar pa EE.XX. poco enantes de que lu fusilaran los franquistes. Ramírez de Lucas, home prudente, elegante, de gran cultura, críticu d’arte y periodista, falleció va un par d’años cuasi nel anonimatu pese a tener una de les meyores coleiciones privaes d’arte popular. Agora, a la lluz de la noticia de la so rellación con Lorca, los focos tornen a apuntar na so direición. En poder de la familia, na so casa d’Albacete, taba un poema manuscritu, inéditu, que Lorca-y escribió tituláu «Romance». Como cellebración del Día Internacional escontra la Homofobia, fino esti pequeñu comentariu trescribiéndolu:
ROMANCE
Aquel rubio de Albacete
vino, madre, y me miró.
¡No lo puedo mirar yo!
Aquel rubio de los trigos
hijo de la verde aurora,
alto, sólo y sin amigos
pisó mi calle a deshora.
La noche se tiñe y dora
de un delicado fulgor
¡No lo puedo mirar yo!
Aquel lindo de cintura
sentí galán sin…
sembró por mi noche obscura
su amarillo jazminero
tanto me quiere y le quiero
que mis ojos se llevó.
¡No lo puedo mirar yo!
Aquel joven de la Mancha
vino, madre, y me miró.
¡No lo puedo mirar yo!
