«Consummatum est». Pues eso, yá ta too amagostao. Tal y cómo venía sopelexándose estos díes, el Comité Federal del PSOE aprobó da-y el preste a don Marianico el Peperu pa gobernar España otros cuatro años. Don Javierín Fernández, el mudu, fizo’l llabor d’enterrador pal que lu teníen contratáu. Otros más llistos quedaron na solombra, esperando repartise lo que quede d’aquello que fue un gran partíu históricu con perimportante presencia política y social. Él -el mudín- ye’l que queda pa la Historia como’l «factotum», el cabezaleru, de la mayor división del partíu na so espurrida historia.
Los que nun somos nin militantes nin simpatizantes nun tenemos derechu a aplaudir o a enfadanos, el que lo quiera que s’apunte, pero eso nun quita pa que podamos tener una opinión sobre’l tema. La mía ye que pa percorrer esti camín de l’abstención, nun facíen falta tantes alforxes. Meyor lo tuvieren fecho a les primeres de cambiu sacando dalgún porgüeyu por ello. Pone-y dalguna condición, ganar dalgo, proponer dalguna cosa. Pero asina, faciéndolo «a pelu» y a última hora, la cosa suena más a derrota qu’a otra cosa.
A la vista la situación ¿había otra alternativa? Pues yo creo que sí. La primera caltriar la posibilidá d’una
verdadera alternativa d’izquierdes, xunto con Podemos ya Izquierda Xunida. Un camín que nun s’esploró. Consideraron a los de Pablín Iglesies más enemigos que’l PP y yá se sabe que «al enemigu nin agua». La presión dende dientro y dende fuera fue considerable. Y si non, lo dicho, emplazar al PP, a cambiu d’una abstención a incluyir nel so programa coses del propiu; a retirar lleis retrógrades; inclusive a plantegar el que nun fuere Rajoy el cabeza de llista. De xuro que’l PP nun diba a aceutar nada d’ello, pero entós sería él el que quedaría marcáu como intransixente y favoratible a facer otres eleiciones, col desgaste qu’ello suponía cara a los votantes.
¿Y agora, a última hora? Pues igual la consulta a les bases nun sobraba. Dalguién fizo demagoxa diciendo que nun diba a consultase too a los militantes pero, coime, esti yera un tema dafechamente importante como pa facelo. Y si non, véase lo apertao del resultáu y la división qu’ello creó. Si falen los militantes, yá nun hai más que falar. Lo demás ye pallabrería inútil: que si abstención téunica, que si votar primero esto y llueu l’otro, que si unos pocos «abstemios» o toos en conxuntu… Voces en castañéu o tanto me da, que me da lo mesmo. Y en cuantes a unes nueves eleiciones, tampoco nun se pue dicir que sería un fracasu de la democracia. Consultar al pueblu nes urnes, anque pueda resultar pesao, nunca será un fracasu de la democracia. Lo contrario, como pasó durante demasiáu tiempu, sí que lo sería.
