close
El «harakiri» del PP asturianu

El «harakiri» del PP asturianu

Mercedes FernándezNun me gusta muncho entrar nes interioridaes de los partíos políticos. La responsabilidá de les decisiones que tomen namás-yos correspuenden a ellos: militantes de base y cargos escoyíos. Ellos sabrán lo que faen y por qué lo faen. Pero cuando eses decisiones cinquen a la vida pública, ye dicir, afeuten en dalgún grau a la ciudadanía, creo que tenemos el derechu y hasta’l deber de criticales. Crítica, nesti sen, nun quier dicir siempre «crítica negativa», sinón cenciellamente dicir lo qu’opinamos d’eses coses qu’inciden sobre nós.

Nesi sen, la decisión del PP asturianu nomando en Xixón a una Xunta Xestora y desposeyendo de los sos cargos a les persones elexíes pa desendolcalos, paezme una cacicada y una enquivocación. Una cacicada que resulta impresentable a tolos güeyos, que vengan dende Uviéu a echar de les sos responsabilidaes a los representantes de la mayor ciudá asturiana. Unos representantes qu’escoyeron una llista ellectoral, refrendada por parte del pueblu de Xixón colos sos votos (munchos o pocos, eso nun vien al casu) y qu’agora, por una decisión de despachu van perder los sos cargos.

Lo peor del asuntu ye que se vía venir. L’enfrentamientu ente doña Mercedes Fernández y doña Pilar Pardo vien dePilar F. Pardo lloñe y los sos desencuentros nun ficieron más que medrar. Dio igual que Pardo repitiere por activa y por pasiva la so disposición a consensuar colos «centraliegos» la so política municipal, inclusive nel so nivel más altu como ye l’aprobación o non del Presupuestu Municipal, nuna decisión que punxo en manes de Mercedes Fernández. Nun-y valió de nada. Queríen la so cabeza. Nun-y perdonaben que, en tolos enfrentamientos ente dambes, la Pardo siempre saliere vencedora. Y la Fernández, que ye una perdedora nata, tenía-yla guardada.

Igual nun me correspuende tomar partíu por nenguna, pero como ciudadanu de Xixón, al marxe de la mio ideoloxía, que ye mui distante de la del PP, creo que la Pardo fizo un llabor de gobernabilidá sofitando al grupu de Foro pa que l’Ayuntamientu nun fuere una «xaula grillos». O eso, o que siguieren gobernando los socialistes que llevaben faciéndolo «tropecientos» años. Dende’l puntu de vista de la derecha, que vuelvo a repitir que nun ye’l míu, paez más coherente axudar a gobernar a Foro, poniéndo-yos condiciones, que continuar en manes de la izquierda. ¿Por qué ye eso malo pal «estáu central» del partíu? Dende llueu, si yo fuere votante del PP xixonés, preferiría eso a lo otro. Y en cuantes a lo personal, adulces si conozo a doña Pilar, pero nun aspeutu que yo xulgo importante, como ye’l respetu y la promoción de la llingua, doña Pilar dio-y siempre mil vueltes a doña Mercedes a la que nunca sentí dicir nada nesi sen.

Opino, anque la mio opinión seya dalgo de baldre, que pa los ciudadanos xixoneses votantes del PP ye humillante, antidemocrático y caciquil la decisión qu’acaben de tomar los «centraliegos». Y lo peor de too, ye una enquivocación. Una enquivocación que va a pasa-yos factura nes prósimes consultes ellectorales. Y si non, como diz el refrán popular: «al platu vendrás arbeyu, sinon ye de mozu ye de vieyu».