Lleva yá munchu tiempu’l PSOE cafiándonos con esa historia del Estáu Federal. Talo paez que fuere la solución pa tolos problemes sociales y políticos d’España. Cuando dalgo nun funciona, o hai que tomar un posicionamientu delantre un fechu importante, saquen de la manga eso de que lo qu’hai que facer ye modificar la constitución y crear un Estáu Federal.
Bueno, igual esa ye la solución de tolos males, pero lo que yo quiero ye que me lo espliquen porque si non mal vamos xulgar si ye cierto o non. Entós ¿cómo sería esi Estáu Federal? ¿Qué Estaos comprendería? ¿Seríen los mesmos estaos que comunidaes autonómiques hai agora? ¿Seríen menos y habría qu’arrexuntar comunidaes ente sí? Por poner un exemplu, ¿Asturies sería un Estáu federáu? ¿Tendría que s’arrexuntar con Llión? ¿Con Cantabria? ¿Colos dos? Y eso ¿quién y cómo lo decidiría?¿Y si una comunidá nun quixera, que pasaría? La única idea que se filtra d’esi «mantra» del federalismu ye que solucionaría’l problema catalán. ¿Por qué? ¿Diben da-yos más competencies a los catalanes qu’al restu? ¿Y a los vascos? ¿Cómo quedaríamos el restu? Y llueu les coses de conteníu: ¿Tendríen esos estaos federales -que nunca dicen cualos son- les mesmes competencies qu’agora? Si ye asina, pa qué entamar tou esi enguedeyu. Y si nun ye asina, ¿qué nueves competencies tendríen? ¿Habría «café pa toos» o dalgunos tendríemos que tomar Cola-cao? Y si fuere asina, por qué Javier Fernández tamién s’apunta al federalismu si vamos quedar competencialmente retrasaos
respeuto a otros?
Ye mui poco serio andar manipulando coses tan importantes como un cambiu na forma del Estáu, ensin tener claro lo que se pretende. Nun pue andase xugando con fueu. Y si ye que lo tienen mui claro too eso del nuevu «encaxe» constitucional, que nos lo digan, pa que podamos decidir si nos convence o non. Pero, la verdá, a min abúltame que too eso ye un puru xuegu d’artificiu que remanen porque nun tienen nenguna solución seria a los problemes del Estáu Español. Nun digamos yá nel casu d’Asturies, onde los socialistes nun queríen nin l’autonomía -artículu 144 y porque nun había otru remediu- y agora resulta que quieren un Estáu Federal. ¡Anda y que vayan a ver la ballena!
