Ando estos díes un poco alloriáu y nun tuvi munchu tiempu pa sentame a poner babayaduques al rodiu de l’actualidá. Como nun quiero que se m’atrase’l blogue pa que nun me riñan los parroquianos, escribo dalguna cosa ensin qu’esto quiera dicir que nun vuelva sobre’l tema. Y cuando digo «el tema» yá pue sabese que falo del tema de los temes, lo que más páxines ta enllenando dende la caída del Imperiu Romanu o por ehí: La consultona catalana.
Lo primero qu’hai que dicir ye que… yá ta too dicho. Porque nesti asuntu unos tán a favor, con unos argumentos, otros en contra con otros, y otros munchos falen ensin argumentos, quiero dicir, con plena «visceralidá», pa un llau o pa otru. Ye como lo de la «Parrala», que sí, que sí, que non, que non… Yo, como faigo siempre, voi poner dalgo emplegando’l «mio» sentíu común, porque munchos falen de qu’esto o aquello ye «de sentíu común», pero abúltame que non tolos sentíos comunes son iguales, sinón que van acordies cola nuestra mentalidá, formación (o deformación), esperiencia y… bilirrubina. Asina que nesti casu yo tengo’l míu propiu.
En primer llugar ocúrreseme qu’una consulta a la xente, seya nel marcu que seya, nunca pue ser malo. ¿Por qué diba a ser malo saber lo que piensa la xente sobro esti tema o l’otru? Yá me prestaría a min que me consultaren al rodiu de munches coses: la oficialidá de la llingua, el modelu d’Estáu, el Concordatu cola Santa Sede, nun sé, sobre cuasi too. Tampoco nun se trata, claro, de convertir el sistema políticu español nun sistema «asambleariu», pero si tuviéremos dalgunes consultes de xemes en cuando, nun sería tan dramáticu esti intentu de consultar a los catalanes esto o l’otro. Home, ya entiendo qu’esta consulta de la Generalitat nun ye neutra, sinón que va nun sentíu mui concretu. Lo que se trata ye de llograr un argumentu de presión pa pidir la independencia. Si un númberu importante de catalanes la sofitaren, podría esgrimise pa desixila delantre’l gobiernu central. Claro que tamién podría pasar lo contrario, qu’esi númberu nun fuese tan importante y la cosa perdiere puxu y se desinflare. Ye un riesgu. ¿De qué númberu de persones falamos pa dicir que’l resultáu sofitaría la independencia? Con tola honradez que puedo y col mio sentíu común, etc. etc. paezme que con menos de los dos tercios de los que tienen drechu al votu nun sería suficiente. ¿Tienen esos votos el señor Mas y los sos amigos? Pazme que non. En dalgún sitiu lleí (pero vete tu a saber) que-yos paecía bastante con un venti tantos por cientu de los votantes. A mi eso paezme una coña, de verdá. Con eso nun se va a nengún sitiu y un par d’años más tarde podría pidise otra consulta pa volver a entrar n’España, como si se tratare de la puerta xiratoria del Café Dindurra. Hai que falar de mayoríes «sustanciales».
Otra cosa al respective de la consultona ye la so posible llegalidá o illegalidá. Nun ye que yo conoza la Constitución de
carrerina, pero paezme qu’una consulta «al personal», ensin más aquello, nun tien por qué ser inconstitucional. Lo que lo sería ye si la rempuesta fuere d’obligáu cumplimientu. Quiero dicir, y digo, que’l Gobiernu del Estáu tuviere qu’acatar el resultáu de lo que saliere. Paez claro que nesi casu habría qu’entrugar a tolos españoles. La cosa ta asina, guste o nun guste y ehí nun valen voluntarismos. Pero la consulta, por sí sola, nun sé por qué non. Pol mesmu motivu tendríen que prohibir tamién les encuestes, pues les encuestes nun son más qu’una proyeución, con una muestra menor, de lo que piensa un determináu coleutivu. De fechu, yá se ficieron encuestes al rodiu de la independencia de Cataluña. Una consulta sería, al mio mou de ver y al mio sentíu común (perdón) como una «macroencuesta» na que la muestra fuera’l total de la población. ¿Sería eso inconstitucional? Yo creo que non.
Y una última custión al rodiu de les dos entrugues: La primera sobra porque, en determinaes circunstancies, y según cómo se plantexare la entruga, tol mundu querría que la so comunidá fuere un «Estáu». Por exemplu: El PSOE nun calla con esa historia del Estáu Federal. Si la cosa siguiere alantre (cosa que duldo), habría que facer una entruga, ésta si vinculante, nel sentíu siguiente: «Usté querría qu’Asturies fuere un Estáu dientro d’un Estáu Federal Español». Habría que dicir que sí, sinón queríes quedar fuera. Total, que principié un poco a lo xo, y yá solté un rollu espantible. Puntu (nun sé si seguíu o final).
P.S. Depués de tener escrito esto, traté de xubir al textu una bandera catalana. El «sistema», o lo que fuere, nun me dexó. En cambiu sí pude xubir l’asturiana. ¿Querra esto dicir dalgo?
