MESSI.- Nun pue dicise que ye la prensa o un ataque antinacionalista: los xueces acaben condenar al xugador del Barsa Messi a 21 meses de cárcel. Nun entrará nella gracies a que tien perres abondo pa pagar una multa más la devolución de lo defraudao a Facienda. Como podemos suponer, la multa y la devolución pagará-ylo el club, o seya los socios, ya instituciones que lu caltienen: televisiones, federación, anunciantes… La mio modesta pregunta ye ¿qu’hubiere pasao si, en llugar de ser un personaxe famosu’l que fai too esto, fuere un tal Pepín Álvarez, o Manolín el Rucu? Pues que taría yá en Carabanchel, o como se llame la so equivalente na comunidá catalana. Y lo malo ye que, amás, la xente nun-y lo va a tener en cuenta con tal que siga marcando goles. ¡Messi yes el meyor!
DEL BOSQUE.- Nun supo marchar pela puerta grande y agora tien de cola pola d’atrás y amás con malos moos: salpicando la honorabilidá d’una gran persona como ye Casillas, por más que llueu salga riéndose nuna semeya de la prensa. Nun sé, nin m’interesa, lo que-y pasó al gran porteru con él y los sos axudantes, pero fuera lo que fuere, nun son maneres salir a chivalo a la prensa a un xugador que lo fue too y siempre, inclusu nos tiempos del pelamangos de Mouriño, un modelu como persona. Lo malo ye que’l Marqués de Del Bosque, anque marchó, nun lo fizo del too y va a siguir garráu a la Federación chupando del tetu. Otra qu’hai qu’apuntar al debe del señor Villar. Lo de señor, claro, ye una forma de falar.
FELIPE GONZÁLEZ.- Esti ye un de los casos nos que se cumple eso de «la meyor pallabra ye la que nun se diz».
Felipe González nun se resigna a pasar desaparcibíu y quier siguir teniendo protagonismu na sociedá española. Lo malo ye que’l so protagonismu ye ramplón y desafortunáu. Aceutando tar n’altos cargos d’empreses (Gas Natural Fenosa) pese al so sueldu vitaliciu como ex-presidente, metiéndose como xuez y parte nel asuntu venezolanu y agora, dando conseyos públicos na prensa sobre cómo tien de comportase’l PSOE cara a la formación de gobiernu, cosa que nun creo que faiga mui felices a los que lleven el pesu de les negociaciones. Eso dizse per dientro y en voz baxa, pa que sólo lo oigan a los que-yos correspuende. Pero, amás, dixo una fras mui peligrosa nel artículu qu’escribió pal diariu El País: (El PSOE) debe ocupar su sitio en una oposición responsable. Lo cual significa al mismo tiempo exigente y dialogante. Siempre lo ha hecho en asuntos de Estado, incluso asumiendo el protagonismo de pactos concretos como la lucha contra el terrorismo. Bien, el tema de los pactos contra’l terrorismu nun ye dalgo que deba ponelu mui arguyosu. Entovía munchos alcordámonos del GAL, de los altos cargos del so partíu que fueron a la cárcel, y del famosu señor X. Hai temes que ye meyor nun ximielgalos.
SAN FERMINES.- Se conoz que’n Navarra nun hai eso como lo de «Asturies laica», y nun-yos da más glayar a toos que «¡Viva San Fermín!» ensin estigmatizar a les autoridaes. Pero lo que daveres m’allerza, a parte esi mangaráu de xente borracho que camienta que nun hai diversión ensin escesos, ye la degradación que suponen les postures machistes y d’abusos a muyeres a lo llargo estos díes. Los refuerzos de policía y los avisos a navegantes falen por sí solos. Y yá, lo del maltratu animal déxo-yoslo a los «animalistes».