Cúmplese un añu más de la Constitución, agora puesta n’entredichu como culpable de tolos problemes del Estáu. Hai que la reformar, pero nun sabemos cómo. N’Asturies, como en toles demás coses, fuimos a remolque de la famosa Carta Magna. En llugar d’aprovechar la nueva circunstancia pa resurdir como País, axuntando tolos esfuercios pa construyir dalgo a comuña, moderno pero allancao en tolo que la Historia nos diere, quedamos otra vuelta al pairo, ensin saber si díbemos o veníemos, retrasando decisiones o esperando por qu’otros les tomaren por nosotros.
Da Pedro de Silva en La Nueva España la bienvenida a aquella Constitución, anque diz que yera «ambigua» no referente al tema territorial. La única ambigüedá qu’había yera’l reconocese o non como Comunidá Histórica. Si asumíes que sí, que yeres una Comunidá Histórica, cola to propia Historia (compartida, claro, pero tuya), llingua, tradiciones, cultura, arquiteutura, vezos, derechu consuetudinariu, etc. etc. teníes el camín del artículu 151 y pasabes a figurar ente los de Primera, ya inclusive podíes llamate Nacionalidá («rexones y nacionalidaes»). Si nun yera asina, si como dalgunes otres «rexones» creyíes que nun tuvieres nenguna trescendencia como grupu coleutivu, como nación humana, podíes tirar pol artículu 143, tamién llamáu la «via lenta». Equí, los nuesos políticos tiraron pola via muerta, que yera peor que la lenta.
¡Qué error, qué inmenso error! repitimos asonsañando a Ricardo de la Cierva cuando nomaron a Suárez Presidente del Gobiernu. Dalgunos creyemos qu’aquella fue, non una oportunidá perdida, sinón «la oportunidá» perdida. El reconocese como País, como nacionalidá, de xuro hubiere camudao munches coses de les que vinieron depués. Pero nun fue asina. Lo curioso ye que, visto colos güeyos d’agora, la realidá da la razón a los centralistes, a los enemigos de lo propio, a los que preferíen ser unu más na mecigaya d’autonomíes que s’entamó llueo. Porque agora, nel mes de avientu del 2014, ¿ónde tán los nacionalistes asturianos? ¿Ónde los que pidíen un mayor autogobiernu? ¿Qué se fizo d’aquellos partíos qu’inclusive llegaron a tener representación parllamentaria y alcaldes, y conceyales…? Miro alredor, y nun veo nada. PP, Psoe, Foro, UPyD, agora Podemos. ¿Quién representa a Asturies? ¿Dalgún d’ellos? ¿Daveres?
Poro, al ver n’onde aparó la cosa, pienso qu’igual fuimos unos ilusos los que creyimos nun futuru como País, como Comunidá con un autogobiernu avanzáu. Igual teníen razón los otros, los centralistes, los «ambiguos»… Asina qu’aprovecho esta fecha emblemátia pa entrugame una vuelta más: ¿tan mal lo ficimos?
