La llamada «Prioridad Nacional» ye un términu llamentablemente de moda dende va un tiempu. Púnxolu de moda Vox, esi remedu mussolinianu y hitlerianu (lo de franquista nun lo digo porque paez que-yos presta) que gobierna en munchos sitios gracies al ansia de poder del Partíu Popular que, con tal de gobernar, ye a xuntase col mesmu demónganu. Y ye curioso que, ensin neguna propuesta seria de nada, ensin programa, ensin siquiera dalgo asemeyao a una retórica del poder, con media docena de frases empobinaes a semar l’odiu, ye curioso, repito, que siga xubiendo nes encuestes. ¿Qué xente lu vota? Quedaríamos plasmaos al sabelo, porque abúltame que nun ye un problema políticu, sinón más bien siquiátricu.
La «Prioridá Nacional» ye, entós, un d’esos mensaxes d’odiu que llancen los «voxeros» pol que, esa xente que vive ente nós, que trabaya xunto a nós, que paga impuestos como nós (direutos ya indireutos) nun tienen los mesmos drechos que nós porque nun nacieron n’España. Vinieron d’otros llaos en cata d’una vida un poco meyor que la que teníen nos sos paises d’orixe. Como si la casualidá del nacimientu (porque ye una casualidá, nengún de nosotros escoyó nacer equí o allá) marcare a una persona de por vida al marxe del so valir como ser humanu. Refugaos na sanidá, na vivienda… como si fueren apestaos. Hai que lluchar escontra eso y hai munches formes de facelo. La política, claro, pero tamién otres nel llugar onde caún de nosotros nos asitiemos. Coles armes que tengamos. Nun hai que tragar con too.
L’arma que tien nes sos manes Juan Ignacio González (Nacho) ye la poesía. Y con ella, colos sos versos comprometíos onde s’esplicita’l dolor, y nunca la resignación, combate a esos desalmaos semadores d’odiu. Una poesía que podríemos llamar «militante» si nun fuere un términu qu’aveza a emplegase nun sentíu negativu. Alcuérdome de cuando entamamos a escribir la xeneración del Surdimientu, que se nos dicía que yeremos «escritores militantes», queriendo con ello rebaxanos como escritores. Pero yéremos militantes qu’escribíemos, que ye distinto. Militábemos (dalgunos d’aquellos entovía siguimos) na causa de la llingua y de la cultura asturianes, y pa ello facíemos, ente otres munches coses, lliteratura. Buena o mala esa ye otra cosa. Nesti casu, la calidá poética de Nacho González ta fuera de toa dulda, lo que yá nos tien demostrao va munchu tiempu. Esti poemariu afonda tamién nello.
Un poemariu que, nun sólo denuncia, sinón que tamién responsabiliza. Denuncia: «Las vidas de la otra orilla/ se amontonan desnudas en la balsa/ reman enfebrecidas en la costa,/ arrojan a la noche sus despojos y se ahogan en silencio./» Pero tamién responsabiliza, nun sólo los políticos son culpables. Carguemos nosotros cola nuestra parte de culpa: «Algunas veces, nos comemos los peces que alimentan». Frase rotunda, terrible, pero enllena d’una verdá que preferimos nun planteganos.
A traviés de los poemes del autor podemos siguir el camín entéru del esiliu, dende’l so orixe («¿De donde vienes tú?»; «La gare d’Austerlitz»…), pasando per un viaxe en verdá «odiséicu» («Lectura en la memoria de las aguas»), hasta aportar a la tierra prometida, o meyor, suañada. Como nel poema «Otra patria»: «Yo no tengo otra patria/ que vivir donde esconden sus raices los sueños/ bajo la yerta luz de la mañana…/»
Convién lleer esta «Poesía contra la Prioridad Nacional» porque, dacuando, acostumbrámonos a les pallabres, a les frases feches y escaecemos lo que daveres representen. Lo que ta embaxo elles. Nacho González vien a refrescanos la memoria, a dicinos que nun nos acostumemos a los tópicos, que carguemos cola nuestra responsabilidá que nun s’agota nuna conversación de chigre. Porque como diz nel final d’un de los sos poemes: «Si tu y yo somos cómplices yo, al menos,/ quiero dejarlo escrito y delatarme». Y yo tamién, amigu Nacho.
