Asina ye como llamaría yo a la sobrevalorada película del clan Almodovar «Dolor y gloria» qu’acaben d’echar pola tele. Ardor d’estómadu que carez abondamente’l protagonista de la historia, por mor de les melecines que tien de tomar y de les drogues que nun tenía de tomar pero que tamién toma. Y l’ardor d’estómadu que se me punxo a min al intentar dixerir una más de les películes del direutor manchegu que sigui dexándome indiferente dafechu.
Too na película me suena a inflao, a impostao a artificioso. El bon actor que suel ser Antonio Banderas abeya con cara de palu per tola cinta como si tuviere faciendo y diciendo coses trescendentes, anque por más qu’aguzo la oreya nun soi a estremales. Seguro que ye cosa mía que me paezan banalidaes. Dicen que Pedro Almodovar tien un mundu propiu qu’espeya nes sos películes. Lo que pasa, entós, ye que a min esi mundu nun m’interesa pa nada. Si se trata del mundu de la homosexualidá hai doscientes películes que lu retraten de meyor forma, y si ye’l de la droga, item más. Paez que la peli ye dalgo (o muncho) biográfica, ta mui bien pero igual podía espresase con menos solemnidá y más soltura. Nos únicos momentos que la peli funciona ye naquellos en que pierde la solemnidá y gana en cenciellez y espontaneidá: cuando sal la magnífica Penélope Cruz, moviéndose por aquel pueblu y aquella cueva encalada que ye a tresformar nuna casa propia. Eses escenes valen por tola obra d’Almodovar que, una vuelta más, arródiase d’oropel pa ver si pasa por oru.
