Intervine esti añu nel famosu festival Celsius 232 pente medies de los bonos deseyos de la profesora y escritora Blanca Fernández Quintana. Llevaba Blanca testerando añu tres añu invitándome, como organizadora de la parte’l festival empobinada al asturianu, pa qu’asistiere y la verdá ye que nunca nun pudiere dir por alcontrame neses feches fuera d’Asturies. Esti añu cuadraron bien los astros y yá nun pudi negame a asistir. La verdá quedé encantáu.
Podría dicise que la cosa tuvo nesta edición un mayor emponderamientu, pola asistencia d’un de los escritores de moda nel mundu de la Fantasía, como ye Brandon Sanderson, xunto a otros cuantos autores de reconocida fama, de fuera y de dientro d’España (al llau míu taba firmando exemplares Rosa Montero, que tamién ye escritora del xéneru), pero afirmen los que siguen el festival dende va tiempu, que’l nivel de xente nun yera muncho más grande que’l de davezu. Y ye que nun pasa como, por exemplu, na Selmana Negra en que tola xente s’acorripia nuna estaya concreta (Naval Xixón, nesti casu), sinón que tola ciudá acueye y esparde a los autores, les presentaciones, les conferencies, les firmes y les ventes de llibros dando un ambiente perguapu al contestu y convirtiendo a Avilés nuna ciudá de… fantasía.
Blanca y yo falamos un poco (bueno, más d’una hora) de la mio trayeutoria lliteraria, na sala de conferencies de la Casa de Cultura, aparándonos na triloxía Fontenebrosa como puntu de partida de la novela fantástica asturiana, y que dio munchu xuegu pol simpáticu aneudotariu que l’arrodia. Y depués ayudóme a presentar, coles sos intelixentes entrugues, el mio nuevu llibru «La sonrisa del tyranosauriu. Antoloxía de cuentos fantásticos». Ellí comentamos les estremaes clases de Fantasía, de les que yo falo nel Prólogu, pues nada nun tienen que ver la que podemos llamar «Fantasía épica» («El Señor de los aniellos», de Tolkien; «Nacidos de la bruma», de Sanderson, o «Fontenebrosa, el reinu de los silentes», por poner unos exemplos) cola otra fantasía que, partiendo de la realidá, de lo «verosimil», introduz na narración un elementu estrañu que lo tracamundia llegando a un final sorpresivu, casu de munchos de los cuentos de «La sonrisa…», siguiendo un poco’l modelu cortazarianu. Pa finar, lleímos un de los cuentos de l’antoloxía que, a petición de la presentadora, fue’l que da títulu al llibru.
Y agora podía un entrugase el porqué del gran puxu anguaño del xéneru de la fantasía. El porqué cientos o miles de rapazos n’Avilés, y millones en tol mundu, merquen y lleen esta clas de llibros que, a lo llargo munchu tiempu, tuvieron consideraos como un xéneru menor, reserváu a un grupu mayor o menor de, vamos llamalos «frikis». Habrá munches rempuestes, pero yo voi dar la mía: Llégome esti día la revista CLIJ (Cuadernos de literatura Infantil y Juvenil), la meyor revista española del xéneru. Na primera contraportada hai un anunciu a toa páxina de la Editorial Planeta d’una novela xuvenil (nun doi el títulu) que pon: «Una historia mágica para enseñar empatía, diversidad e identidad. Un cómic juvenil que abre puertas al diálogo sobre inclusión y respeto». Yá la pallabra «enseñar» rínchame. Una novela (xuvenil o non) nun ta pa enseñar nada, ta pa contar una historia, bien contada, entretenida, bien escrita que t’aliende a siguir lleendo y te dexe un posu de placer y entretenimientu. Si llueu, además, aprendes coses, muncho meyor, pero esi nun ye l’oxetivu. Pa enseñar tán otra clas de llibros. Y depués vien tolo politicamente correuto: la empatía, la diversidá, la identidá, la inclusión… Valores mui positivos, pero que nun correspuenden a lo que tien de ser, a mio modestu talantar, una novela xuvenil. Nun hai que «alecccionar» a los y les chavales, anque seya con bona voluntá. Pa eso hai otros medios y otros escenarios. Poro, paezme a min, los chavales fuxen d’estos llibros y abellúguense nes noveles de fantasia, onde hai llibertá, aventura, emoción y, eso sí, la eterna llucha del bien escontra’l mal, de la lluz frente a les solombres. Pero ensin emplegar les correiciones polítiques que llastren la riqueza de la llectura, del descubrimientu. Como siempre ficieron los De Foe, London, Verne, Salgari, Swift, Wells y otros tantos que nos allegraron los nuestros años de mocedá. O eso ye lo que yo pienso.
