Títulu: Refugio 3/9
Autora: Anna Starobinets
Torna: Marta Sánchez-Nieves Fdez.
Editorial: Nevsky Prospects, S.L.
Añu: 2015
DIFICIL LLECTURA.- Anna Starobinets ye una de les escritores ruses más importantes, dientro de la nueva xeneración, nel mundu de la Ciencia Ficción y la Fantasía. El so primer llibru Una edá difícil (2005), tuvo una gran acoyida nel so país y nun dexó indiferencia nel nuestru. Filóloga de formación fue crítica, reportera y editora de cultura pa dellos importantes periódicos del so país. Tamién trabayó nel mundu de la lliteratura infantil y xuvenil (La tierra de les neñes bones…)
Tengo de dicir qu’esta novela, Refugio 3/9, ye de difícil llectura. Raspiando col surrealismu, l’autora crea unos mundos oníricos nos qu’entemez realidá y fantasía, xugando con una riestra grande de mitos, personaxes, frases y cosadielles del folklore del so país que munches veces se nos escapen a los simples llectores d’una cultura mui estremada de la suya. Con esos materiales, Starobinets construi una trama catastrófica na que l’apaición d’un nuevu sol va a destruyir el nuestru mundu, a nun ser un pequeñu grupu d’elexidos que s’abellugaríen nesi Refuxu 3/9 que nos da’l títulu. Pero l’apaición d’esi nuevu sol que s’allega al nuestru firmamentu, vien precedía per una serie de cambeos, de mutaciones que fai que delles persones tracamundien la so fisonomía camudándose n’otra cosa. Y equí apaez Kafka, claro, y la so Metamorfosis, pero tamién otros autores de fantasía, como el tamién surrealista Michael Ende y los sos cuentos “El espejo en el espejo”, ya inclusive dalgo de la nuestra mitoloxía asturiana porque’l so personaxe de “Boscoso” o “Pantanoso” pudieren oldease col Busgosu o Mofosu, como lu vien llamando Sánchez Vicente. Realidá abegosa y mundo fantásticu, namás separtaos per una ponte que pue trespasase nos dos sentíos. ¿Una llocura?
En fin, nun quiero recomendar la llectura de la novela pa tol mundu, pero si dalguién quier lleer dalgo nuevo, estraño, bien escrito, dacuando prestoso y dacuando desagradable, ensin pidir un argumentu racional o llóxicu, que s’avere a estos mundos de Anna Starobinets y nun quedará indiferente. Anque hai qu’abrir muncho’l maxín, claro.
