Dicir que la lliteratura asturiana ye un milagru pue sonar a tópicu, pero nun lo ye. Trátase d’una verdá como una casa. Porque un milagru ye que cola probitú qu’arrodia al mundu editorial asturianu, faltu d’enfotos institucionales (unes subvenciones probes y mal plantegaes nun son solución), ensin puntos de venta especializaos, cola ausencia d’intermediarios culturales qu’averen los llibros a los llectores, con unos maestros d’asturianu na so mayor parte ayenos a la nuestra lliteratura, unes biblioteques que, o nun tienen o arrequexen el llibru asturianu, y un públicu llector desinformáu y desinteresáu de lo nuestro, sigan saliendo verdaderes xoyes lliteraries que se cellebraríen con llanzamientu de cohetes n’otres comunidaes con llingua propia. Y ye que nosotros somos siempres una esceición.
Lleguen esti día a les mios manes dos llibros qu’amuesen esa escecionalidá de la que falo. Dos xoyes lliteraries que podríen facer les delicies del públicu llector… si ye que llegaren a les sos manes. El primeru ye «Versonaxes», editáu por esi luxu d’editorial que tenemos en casa, que ye «Pintar-Pintar», con testos d’Aurelio González Ovies y dibuxos d’Ester Sánchez. Unos testos imaxinativos, ocurrentes, simpáticos que con una rima fácil puen facer les delicies de los neños… y de los non tan neños. Xunto a ellos unos guapísimos dibuxos d’Ester Sánchez enllenos de gracia y orixinalidá, con un estilu que yo llamaría «de pespunteao» (perdona Ester… ya sabes) y qu’acompañen a los poemes faciendo un too unitariu. Axuda tamién una diseñu superorixinal, onde unes páxines nun sentíu y otres n’otru nun suponen dalgo «estrambótico», sinón un complementu más pa ensalzar al llibru. Norabona.
El segundu milagru vien de la mano de la tamién exemplar editorial «Trabe», que tantos y tan bonos llibros lleva tiempu
asoleyando. El títulu ye «Pincelaes» y los testos son d’Iris Díaz Trancho. Trátase d’una especie de «cuadernu de viaxe», tanto real como imaxinariu, al traviés d’un puñáu de ciudaes y paisaxes d’evocadores nomes: Alamut, Alexandría, Bandiagara, Samarcanda… y hasta una Liébana que nos pilla más cerca. L’orixe de los testos ta nun programa de radio que l’autora fizo va yá un tiempu, de la mano del polifacéticu Antón García, pero qu’esceden con muncho aquel primer intentu, siempre condicionáu pela inmediatez y l’escaezu que suponen les ondes. Agora, ún pue sentase a tastiar cola calma que merecen unos comentarios que se bancien ente lo exótico y lo poético, d’una autora ca día más afianzada nel panorama lliterariu asturianu. Una autora que nun se prodiga muncho, pero que lo que fai siempres lleva’l sellu de la calidá. Xunto a los testos, los dibuxos de Miguel Pérez Iñesta esnalen per llibre ensin axustase satamente a los llugares referenciaos. O si lo faen, ye dándo-yos una nueva dimensión, una imaxe distinta. Miguel, al que conozo dende va munchos años, ye un artista completu, anque la so especialidá ye la música clásica, nun en vano ye músicu profesional de la Orquesta Sinfónica de Berlín. Xuntos los dos, fueron a llograr esti otru milagru de «Pincelaes» que, más que pincelaes, formen un preciosu cuadru, al oleo, de lo que podría algamar la lliteratura asturiana, si fuéremos un país normal. Ta claro que nun lo somos.
