Ye un grupu que vien dende va tiempu funcionando nel nuestru País con guapos montaxes en castellán. De la mano d’Ana Eva Guerra y Moises González, llevaron a los escenarios unes prestoses versiones de «Senso», «Macbeth», «La cabeza del dragón» y otres delles, con una dignidá, pese a la economía de medios, perestimable. Amás de la obra de Valle Inclán de «La cabeza…» tienen otres obres pa neños tamién mui afayaíces, como «Semillas de cardamomo». Va un tiempu, encargáronme una versión n’asturianu d’esta obra qu’acaben de representar agora nel marcu de: «Escenines», entamao pol grupu de families de «Reciella» nel salón d’actos del Colexu Públicu Xovellanos. Asina pues, la obra «Grana de cardamomu» escenificóse ellí esti día con, al mio paecer, un gran ésitu. Soltura, bon facer, nin un enquivocu nos testos, simpatía… en resume qu’ellos como actores/montadores de la obra, y yo como responsable de la versión n’asturianu, salimos percontentos d’ellí. A ver si agora tienen suerte y tanto l’alministración, como los colexos y entamadores d’esti tipu d’actos cuenten con ellos pa socesives actuaciones. La obra ye mui prestosa y ellos fáenlo divinamente. ¡Suerte, amigos!
(Na semeya tamos Moises, Ana Eva, Paula y yo mesmu, a la fin de la representación)
