El suizu Joël Dicker ye un escritor que, yá de mui mozu, tuvo un reconocimientu mundial cola so primer novela: «La verdad sobre el caso Harry Quebert». Nel so día fici la crítica (mui personal) d’esa novela y ehí ta pal que quiera lleela (poner nel buscador el títulu). Una novela entretenida, pero… tramposa. Na que saca de la chistera coneyos cuando-y interesa pa dar más emoción al asuntu, pero ensin nenguna seriedá nin coherencia. Dicía yo naquel comentariu que nun ye que saque cartes nueves de la baraxa, sinón que nos saca una baraxa nueva de cada vez.
Lleo agora la última obra qu’escribió, «El caso Alaska Sanders», na que l’escritor suizu emplega’l mesmu métodu que na anterior. Hai un crime, una investigación y una primer solución. Y digo primera porque l’autor de Xinebra va complicándonos la historia, sacando del bolsu coses nueves de los personaxes, retorcigañándolos hasta que faigan lo qu’elli quier. Lo que pasa ye que, depués de baillar tanto col asuntu, un termina por aburrise. A la quinta solución apetezte dicir que, a esa Alaska, matástela tú. Pal mio paecer, de les cuasi 600 páxines de la novela sóbren-y la metada, eso siendo xenerosu. Pa más aquello, el suizu entemez nesta novela a personaxes de l’anterior, na que tamién introduz coses nueves d’ellos, colo que ye, como dicíamos de guah.es: «el cuentu de nunca acabar».
Que la novela ye entretenida, val. Que a la fin termina un aborrecíu, tamién. Que ye tramposa, lo que más. Igual que termina d’una manera, podría siguir escribiendo otres doscientes páxines y poniéndonos otros cuantos finales distintos. Pero equí nun se trata d’un concursu d’adivinación, sinón de cuntar una historia curiada y coherente. Y ensin xuegos de manos. Pa lo otro prefiero dir al Circo.
