close
El Día del Llibru

El Día del Llibru

figura-de-llectorGüei, 23 d’abril, cellebramos el Día del Llibru. Yá sabemos, la fecha del fallecimientu de Cervantes y Shakespeare. La mio cellebración pública fícela nel Acuariu de Xixón, onde s’entregaben los premios del Concursu Pepín de Pría que tolos años entama el colexu Jacinto Benavente, de Vega, esti añu cola collaboración del Acuariu. Nesti casu, la organización (en realidá Mª Xosé, de la Oficina de la Llingua, que tamién collaboraba) pidióme una fras d’aniciu pa los neños que quixeren escribir un cuentu, y un par de versos pa los de poesía. La fras p’aniciar el rellatu yera: «En cuantes entramos nel Acuariu supi que dalgo nun andaba bien. Teníame llevantao col pie izquierdu, y yá sabes lo que pasa cuandu un se llevanta col pie izquierdu…» Y el principiu del poema tendría de ser: «Los pulpos, xugando al futbol,/ nun tienen nengún rival… etc. etc. El concursuacuariu-de-xixon1 fue un ésitu de participación y de resultaos, pues surdieron coses dafechamente guapes. Y güei, repito, entregábense los premios nel Acuariu. Y fízose ehí porque, como dixi, esti equipamientu de la ciudá de Xixón, collaboró col colexu na organización del eventu. Nun sólo eso, sinón que se fizo una cosa perguapa que fue que’l colexu apadrinó a dos de los pulpos que tienen el so llar nel recintu xixonés. Punxéronse-yos los nomes de Nel y Flor, como la famosa obra del de Pría, y asina, depués de salir los neños y les neñes premiaos a recoyer los gallardones, y dicir unes pallabres los que tábemos invitaos, firmóse nun documentu oficial del Acuariu dichu apadrinamientu. Agora, yá podéis dir a visitar a Nel Y Flor que, de xuro, taríen percontentos colos sos nomes si pudieren enterase. Y a lo meyor ye asina… La mio reflexón ye que me paez perinteresante que, instituciones sociales o culturales, como l’Acuariu, participen en coses que cinquen a la llingua asturiana. Ye, ensin dubia, una forma de facela visible y sacala de los circuitos (siempres minoritarios y marxinales) nos que se vien moviendo. A ver si cunde l’exemplu y otres sociedaes que viven y trabayen nel nuestru País, arrimen un poco más el llombu y acuden al rescate d’una llingua tan necesitada d’ello como ye la tradicional de los asturianos.