Nun soi yo mui aficionáu a eso que llamen «realismu máxicu». Sí me prestó «Cien años de soledad» porque yera novedá y, sobre too, porque cuasi tolo que nos llegaba de la llónxana y diferente Sudamérica tenía esi aire a maxa y fantasía, al puntu que nun estremabes mui bien lo que yera real y lo que suponía esaxeración, qu’eso ye en definitiva de lo que falamos. Claro que nunca llamaría a los cuentos de, por exemplu Borges, «realismu máxicu», sinón más bien fantasía pura, o meyor, fantasía… ilustrada.
Quiero dicir qu’equí, n’España. los nuestros escritores cuasi nunca lu emplegaron, ente otres razones porque la Fantasía, en xeneral, nunca tuvo mui bien vista, como persabemos los que dacuando la prauticamos. Podríemos contar colos deos d’una mano los autores destacaos nesa especialidá.
Recomiéndenme, agora, unos amigos (Charo y Alfredo) esta novela firmada por David Uclés, autor que nun conozo, que se titula «La peninsula de las casas vacías» y que ye un percorríu a lo llargo de lo que fue la nuestra Guerra Civil, peñerada a traviés d’una narración qu’incide nel realismu máxicu. O seya, de lo que falábemos al empiezu. Asina, l’autor tómase toles llibertaes que quier nel tratamientu de personaxes y situaciones, nun pueblo de Jaen del que, col nome cambiáu, ye oriundo esti escritor: Xente que va desdibuxándose baxo una lluvia fuerte, hasta esapaecer; families qu’ascienden al cielu (como la Virxen María) un día propuestu pol cura; otros que sangren ceniza en llugar de sangre… en fin, ye pa contar y nun aparar. A min too ello déxame un poco fríu porque, amás, David Uclés paezme un bon escritor y abastábame col diseñu y los acontecimientos «normales» del pueblu pa esfrutar d’una historia rural interesante. O seya, que nun tenía menester d’emplegar nenguna clas de «realismos máxicos». Pero, en fin, caún escribe y cuenta lo que-y paez.
Moléstame tamién, embaxo esi mesmu aspeutu, la utilización del narrador que, nun ye que seya omnisciente, ye que amás anda tol día (o seya tol llibru) falando colos llectores y colos propios personaxes de la novela, adelantando coses que van soceder nel futuru y otros trucos que, pa esti qu’escribe, ye un recursu un poco tramposu. L’exemplu más estremu ye cuando’l narrador de la historia baxa de la so mesa de trabayu y concierta una cita con Franco, pa entrugá-y qué ye lo que ta faciendo y lo que quier facer con España y los españoles. Un coloquiu sorrealista y seguramente simpáticu. A min non me prestó. Y tamién aprovecha pa sacar nel llibru a personaxes famosos de la época, falando con Odisto, el protagonista de la obra: Orwell, Miguel Hernández, etc., talo que na película de «Forrest Gump».
Tán llueu les escenes pures de la guerra. Equí l’autor escueye les más crudes y regodéase colos horrores, que cuenta con tou detalle: los asesinatos de la Plaza Toros de Badajoz, l’ametrallamientu de los malagueños na fuxida de la ciudá… Coses conocíes pero nes que s’ensaña con macabres descripciones. Como colofón, l’enfrentamientu ente los dos hermanos, fíos d’Odisto, como una metáfora (que nun ye nueva) de la Guerra Civil.
Nun puedo dicir (y nun voi facelo) que David Uclés seya un mal escritor. Nun sedría verdá. Pero «La península de las casas vacías» nun me gustó. Igual ye que soi un poco repunante pa según qué coses. Pero, en cualquier casu, gracies a los amigos que me la recomendaron, porque pa saber si una cosa te presta o non, enantes tienes que la probar. Asina que gracies, y un abrazu.
