Títulu: «A sangre y fuego» (heroes, bestias y mártires de España)
Autor: Manuel Chaves Nogales
Editorial: Austral Narrativa nº 631
Añu: 2009 (reedición)
Dacuando, aporten a les tos manes llibros non buscaos, autores desconocíos, como una especie de botella al agua que dalguién dexa cayer pa qu’otru la recueya y conoza’l so conteníu. Asina, un migayu por azar y otru migayu porque la mio muyer conoz los mios gustos, llegó al mio poder esti maraviosu llibru de rellatos qu’acabo lleer.
Manuel Chaves Nogales fue un escritor y periodista sevillanu al que-y tocó vivir la esgarradora época de la Guerra Civil. Intelectual republicanu, firmó’l manifiestu a Ortega y Gasset, a finales de los años venti, xunto con Corpus Varga, García Lorca, Francisco Ayala, Ramón Sender, Jarnés y otros intelectuales de la época y, como tolos firmantes, apoyará a la Segunda República na que víen un intentu de modernizar a aquella España secularmente atrasada. Como periodista, viaxó per tol mundu, entrevistando a les más grandes personalidaes de la época. Participante na tertulia de don Manuel Azaña, fizo por defender aquella famosa frase azañista de: paz, piedá, perdón. Durante la guerra dirixó’l periódicu Heraldo, el de mayor tirada nel bandu republicanu. En 1937, cuando’l Gobiernu llegal de la nación abandona’l so puestu en Madrid y se fuga pa Valencia, Chaves Nogales, deceicionáu pol camín que tán tomando los acontecimientos, en manes de los estremistes d’un y otru bandu, exíliase a Francia y depués a Llondres, onde muerre el 4 de Mayu de 1944. Tenía 46 años.
A sangre y fuego ye un cuentiariu que consta de nueve cuentos. Escritos en 1937, cuando entá la guerra taba ensin decidir, narren diferentes anéudotes reales namás camudándo-yos los nomes. Son, pues, nueve cachos d’una realidá que taba asocediendo nesi mesmu momentu y, poro, escritos cuasi escuchando’l ruíu de les bombes y los glayíos de los muertos y feríos. Son nueve cuentos terribles, onde l’autor espeya tola baxeza, la ruindá y tamién la heroicidá d’unos homes y muyeres enfrentaos a un drama que causó un millón de muertos. Con una escritura clara, d’una espresividá rotunda, Manuel Chaves Nogales va llevándonos d’un campu de batalla a otru, d’un escenariu rural a un urbanu, d’un bandu fascista a otru revolucionariu, ensin dexanos tiempu a recuperanos, ensin poder pesllar un momentu los güeyos pa descansar. Cuentos espléndidos, redondos, que resplanden con tola crueldá de la guerra ente hermanos. Una guerra que saca tolo peor de los homes, envidies, vengances, odiu, violencia… Pero tamién, dacuando, tolo meyor, compasión, valentía, heroísmu… Histories que t’allercien, pero que nun yes a dexar de lleer, siempre con un xirpíu nel corazón. Nun podría escoyer cual me prestó o m’horrorizó más, pero abúltame que La gesta de los caballistas; Y a lo lejos una lucecita y Bigornia, podríen recoyer l’espíritu de la obra d’esti gran escritor que quixo, y nun pudo, pertenecer a lo que l’autora del emocionante Prólogu llama «la tercera España». La que quixo conciliar eses otres dos españes que, como na pintura de Goya, sapozaron los pies na tierra pa poder pegase col garrote.
Si los historiadores utilicen, a veces, les obres lliteraries como «fonte de la historia», equí tienen un exemplu perválidu pa cualquier estudiosu de la época. Un rellatu fiel y apasionáu d’unos años y unos fechos terribles que marcaron, «a sangre y fueu», a un país y a varies xeneraciones de compatriotes.
