Ye’l tema de la soledá un de los más queridos na historia de la poesía española. Dende’l resignáu Lope de «A mis soledades voy, de mis soledades vengo…», hasta l’imaxinativu «Pesa la soledá. Perpesa. Com’un paxu enllenu, de silencios azules» del gran Sánchez Vicente. Y ye que la soledá ye dalgo que, en dalgún momentu, toos fuimos a sentir. Trátase, pues, d’un sentimientu, a la vez individual y coleutivu. Caún siéntelu como individuu, como ser únicu y feble, pero al tiempu sabemos que la suma de los individuos ye la suma de les soledaes. Asina lo reconoz Ángeles Carbajal, autora del poemariu «Quedar a solas» de recién publicación pola editorial Impronta. Y nun fai falta adentranos nel conteníu del llibru, porque yá na mesma cubierta afirma, asonsañando a la infeliz Violeta Parra que «…todo canto es el de todos como de todos es también la soledad». Pues eso, que «el canto de todos es mi propio canto».
Ángeles xuega cola soledá y nótala nel recuerdu de la persona querida: «demasiado amarga esta sed que me habita/ y que no puede olvidarse de ti.» Porque, d’un mou o otru, y estos sentimientos nun necesiten desplicación, lo que siente agora ye que «donde ayer te encontraba hoy ya no estás». Y eso ye abondo pa que, fuere pol motivu que fuere, t’enllene la sensación de soledá.
Una soledá que la escritora siente tamién nel pasu del tiempu, que nos avera hasta la muerte. «dejémonos de dioses y que la muerte nada nos importe». Un trescurrir vivencial que va segando del nuestru llau a la xente querida, y que va camudándonos en seres supervivientes: «Los supervivientes somos laberintos por los que aúlla el lobo del silencio», al puntu que nos faiga pensar qu’igual nun paga la pena sobrevivir a costa de ver morrer/ desapaecer a tantos que convivieron con nós: «Si algún Dios ha de salvarme/ que no sea a costa de tanta muerte». Poro, igual ye preferible algamar d’una vez el final del nuestru viaxe, como titula nun de los sos poemes. Pero, mentanto se vive, se sobrevive, la nuestra condición humana ye siguir entrugándose poles coses, porque «puedo vivir sin respuestas/ pero he nacido para preguntar».
Anque tol poemariu ta endolcáu por esi tastu de solitú, hai momentos nel mésmu en que la poeta da pasu a sensaciones de vida, de cambiu de piel, talo que les culiebres que dexen atrás lo seco, lo vieyo y reverdecen a la vida, anque seya por pocu tiempu: «Y la luz de la mañana, impávida diosa, baña mis ojos/ y el agua fresca, y el aire, reciente y eterno, me visten de verano/ y consiento en vivir, aunque no sé.» Porque’l vivir tamién ye un aprendizaxe.
«Quedar a solas» ye, pues, un guapu poemariu d’una escelente poeta como ye Ángeles Carbajal. A min préstame más cuando escribe n’asturianu, pero eso yá son gustos personales. Nun sé, nótola más fresca, más auténtica, pero esto dígolo porque tengo confianza con ella y porque nun desmerez, n’absoluto, de la so espléndida obra en castellán. Y anímola, anque sé que nun fai falta, a siguir escribiendo na llingua qu’ella quiera, porque sabe que, pese a que lo diga nun poema, nun ye verdá eso de «haber vivido tan breve y por tantas cosas, y para quedar a solas». Angelines, nun tas sola, tienes montones d’amigos y almiradores.
«Quedar a solas»
Ángeles Carbajal
Impronta
2019
