John Grisham ye un de los autores norteamericanos contemporaneos que más llibros vende. Cada llibru d’elli conviértese nun superventes. Y delles de les sos histories camudáronse en películes de gran ésitu, como por exemplu «La tapadera», «El informe pelícano» o «Legítima defensa», por citar namás a unes poques. Especialista nel tema de xuicios, ye un de los pocos grandes vendedores qu’axunta interés y calidá lliteraria. Elli mesmu ye abogáu polo que, en toles noveles, ye quien a facer una trama bien plantegada y meyor resuelta.
Cayó nes mio manes una novela suya que ye de les menos conocíes (polo menos por min), y que lleva por títulu esti qu’encabeza’l blogue. «Los litigantes». Y fue una verdadera sorpresa porque, ensin desdexar el tema xudicial, tolo contrario, resultóme una novela divertidísima. D’eses que pases y pasées pela llectura con una sonrisa nos llabios y que, dacuando, conviértese nuna carcaxada. Y yo nun tengo la risa mui fácil.
«Los litigantes» cuenta la historia d’un bufete d’abogaos que nada nun tien que ver colos de los grandes despachos neoyorquinos. Asitiáu nun barriu probe de Chicago, y dirixíu por dos profesionales de «poca monta», dedíquense a pasiase per hospitales, ambulancies y tanatorios a ver si-yos cai dalgún casu al que poder garrase. Divorcios, separaciones, y accidentes domésticos tamién son bienveníos. A estos dos «abogaduchos» va a xuntáse-yos un executivu d’una gran firma de la ciudá, que yá ta fartucu de trabayar de sol a sol, ensin vida privada, anque tien una muyer guapa y llista, y que renuncia al pastizal que ta ganando por poder cenar en casa y facer vida de familia. Despídese de la empresa, emborráchase y nun sabe cómo, va a parar al despachu de los «parias».
Un día, un migayín por casualidá, llega a les sos manes un casu que, nidiamente, escede a les sos posibilidaes. Un tema d’una multinacional farmacéutica que tien nel mercáu un medicamentu que, a xuiciu d’ellos, de los abogaos, produz unos terribles efeutos secundarios. Quieren denunciala y pa ello axúntense a otros más profesionales y avezaos a esti tipu de denuncies. Lo que vien depués ye una serie de divertidísimes peripecies, protagonizaes por estos tres mosqueteros y la so secretaria, de color, y de vuelta de munches coses que, como dixi, conducen la llectura per un camín mui prestosu. Nunca enantes lleere de John Grisham una historia nesi plan. Tendré que rebuscar ente lo muncho que publicó a ver si atopo otra ayalga como ésta. Mui recomendada pa los que quieran pasar un bon tiempu de llectura.
