John Grisham ye un escritor mui conocíu porque delles obres suyes lleváronse al cine con gran ésitu. En dalguna d’elles, amás, fizo tamién el guión. Películes como «El informe Pelícano», «La tapadera», «El jurado», «Tiempo de matar»… son dellos exemplos. Les sos noveles fueron superventes y ye un de los escritores vivos que más exemplares tien vendíos. Por too ello, y porque soi un poco «rarín», siempres fui roceanu a lleer obres suyes. Eso de les superventes dame un poco grima, seguro que ye envidia. Pero por causes que nun vienen a cuentu llegó a les mios manes la novela «Un abogado rebelde», torna inexauta de «Rogue lawyer» que sería más bien «un abogáu deshonestu», y púnxeme a lleela: Acerté.
En realidá Sebastian Rudd ye un abogáu bastante honráu lo que pasa ye que ta dedicáu a defender a la gandaya social, a aquellos casos que naide quier, drogotas, delincuentes, pequeños mafiosos… y tamién dalgún grande. Él camienta que tol mundu tien drechu a un xuiciu xustu y ta dispuestu a que seya asina, porque los qu’avecen a ser dafechamente deshonestos son fiscales, xueces y policíes que, nos casos que cuenta, faen trampes hasta xugando a les cartes. El mundu nel que se mueve ye pelligrosu y, poro, la oficina de Sebastian ye una furgoneta a prueba de bales que conduz el so guardaespaldes y amigu Partner. Dambos van armaos. Na novela entemécense tres o cuatro casos xudiciales que tien que defender, y la verdá ye que l’autor fáenos un retratu perfeutu del mundu xudicial y del desarrollu de les sesiones. Pa min, que siempre fui aficionáu a les noveles y les pelis de xuicios, fue mui prestoso. Tien, amás, un sele sentíu del humor asina que pues tremar ante un casu mui abegosu de trata de blanques, o sonriir ante lo que-y pasa cola so ex-pareya qu’agora vive con otra muyer. Una llectura mui recomendable y pa repetir con esti bon escritor… anque seya un «best-seller» ¡Qué vamos facer!
«Un abogado rebelde»
John Grisham
Ed. Plaza y Janés
