Diben cuatro años que nun sabía nada d’ella, pero la discreción de Paco Abril y del so fíu Gabriel, nun podíen tapecer lo que yá yera una evidencia: que Victoria estaba malina y mui alloñada del mundu lliterariu y, por desgracia, del de los sos amigos. Una amistá de munchos años que, agora, que yá nun ta con nosotros, pasen per delantre los güeyos como un recordatoriu de momentos guapos. Ella fue la que me fizo l’ «Entamu» de la mio primer novela, «Fontenebrosa», nel añu 1984. Un «Entamu» que nun sé por qué nun se conservó nes ediciones posteriores. Y guardo tamién l’ultimu corréu que m’unvió, en febreru del 2022, mui contenta porque «Páxines del diariu de Simón» acababa ser recomendáu por New Spanish Books na so edición n’inglés, y onde amás venía un cita del Clij qu’ella dirixía. Ente los dos escritos pasaren 37 años que podría rellenar con una prestosa correspondencia onde Victoria amosaba’l so amor polos llibros, pola so tierra asturiana que tanto echaba de menos y pola ausencia de los amigos que dexó perequí y a los que vía mui de ralo en ralo.
Nun quiero, nin seguro podría, poner equí la so trayeutoria personal y lliteraria, abaste con dicir que, al mio modestu talantar, yera una de les persones que más sabía de lliteratura infantil y xuvenil y que pasó per tolos xuraos de los premios más importantes d’esta categoría. Y el llabor que dexó fechu como Direutora de CLIJ (Cuadernos de Lliteratura Infantil y Xuvenil) ta entovía por reconocer. Sobre too na so tierra, n’Asturies, pues dende un principiu reseñó los llibros que salíen n’asturianu y nos resúmenes añales había siempre un sitiu pa la nuestra llingua, al llau de les demes llingües que yeren oficiales. Tovía naide-y lo agradeció, que yo sepa.
En fin, que toi pertriste por esta gran perda y, amás de dar el pésame a la so familia, quiero dexar equí, por escrito, el ciñu que-y tenía y la güelga que nos dexa a los que fuimos los sos amigos. Que la tierra te seya suavina, Victorina-Victoriana, como te prestaba que te llamare.
