La mayoría, por nun dicir toos, de los qu’escribimos n’asturianu facémoslo por un doble motivu: en primer llugar porque nos presta, porque nos ayuda a desendolcar una afición, una dedicación positiva, dalgo que llevamos dientro y queremos sacar afuera y compartir con otros. Y en segundu llugar porque nos paez que, d’esa manera, tamién collaboramos a afitar y esparder una parte importante de la nuestra cultura como ye la llingua. ¡Qué decepción, entós, pa esos que piensen que nos facemos ricos con ello! Esos que, naguando por desprestixar al asturianu, defenden que namás queremos les perres que s’orixinen, como subvenciones, prebendes, etc. En fin, oxalá se muerdan la llingua, la suya, y asina muerran envelenaos.
El casu ye que pa nosotros, los esforciaos del papel y la pluma –vamos, del ordenador- les úniques satisfaiciones que tenemos ye, al marxe d’un llabor bien fechu, el posible reconocimientu por parte de los llectores o de los críticos –si ye de dambos meyor- de la obra que ficimos. Del cuentu, la novela, la poesía, l’ensayu o la pieza teatral que fuimos a escribir. Esa ye la nuestra mayor recompensa.
Toi, pues, mui contentu de ver cómo nel últimu númberu de la prestixosa revista CLIJ (Cuadernos de Lliteratura Infantil y Juvenil), nel númberu especial empobináu a estudiar el panorama del añu, afalaguen al album que me publicó la editorial Pintar-Pintar, y que lleva por títulu “Páxines del diariu de Simón”. Y la sastisfaición ye mayor cuando’l llibru ye recomendáu nun solo nel apartáu especial empobináu a la llingua asturiana, sinón tamién nes páxines de tolo que se publicó en castellán, una montonera de títulos, yá que l’album tuvo una edición nesa llingua.
D’esi mou, esa pequeña historia de la rellación de dos compañeros de clas, Simón y Héctor, na que un d’ellos ye autista, fue quien a trespasar les nuestres fronteras llingüístiques pa tener una reconocencia más allá d’elles. Y amosar, amás, que los qu’escribimos n’asturianu nun lo facemos por recursu, pola imposibilidá de publicar d’otru mou, sinón por comencimientu y tamién, polo menos nel mio casu, por placer. Pol gustu d’emplegar esa llingua tan guapa que ye la llingua asturiana. Total que, como pongo nel títulu d’esta entradina, esti día tuvi un prestosu reconocimientu. Un reconocimientu que creo que pue facese estensivu a la nuestra llingua y a tolos qu’escribimos nella. Dende equí, una pequeña norabona pa toos y toes.
