A mui pocos escritores noruegos lleí, sacante a Ibsen que queda yá un migayín lloñe, y aquella novela de Knut Hansen titulada «Hambre» y que venía nuna coleición de bolsiellu que se llamaba (paezme) «Reno». La verdá, yá nun m’alcuerdo nin de qué trataba. Asina que poneme a lleer a Per Petterson fue toa una novedá. Una novedá prestosa porque la so llectura fue un descubrimientu. Atráxome yá dende un títulu tan guapu como «Salir a robar caballos», una especie de xuegu de chavales que lo que na realidá facíen yera dir a montar unos caballos semiselvaxes que tenía un vecín del pueblu onde vivíen. Y siguió atrayéndome l’estilu cenciellu y poéticu de la so prosa que, a la primera, paezte que ye namás descriptiva pero que, a midida que vas entrando nella, vas pescanciando la fondura que tien.
La historia desendólcase nun pueblu noruegu yá mui cercanu a la frontera con Suecia, onde’l protagonista, un paisanu de cuasi ochenta años, vive solu, cola compaña d’un perru, pues la muyer cola que compartía la vida morriere facía tres años. Ellí, nuna vieya cabaña recuperada, arréglase colo mínimo mentanto acorica los recuerdos de cuando yera chaval. Una época d’espertar a la vida, enllena d’anecdotes nun toes agradables. Y recuerda, sobre too, la rellación con so padre, un personaxe estrañu al que siempres arrodió un álitu de misteriu. Y ye yá depués de vieyu, mientres sobrevive solu nesa cabaña, cuando va a descubrir el misteriu paternu y les reiteraes ausencies ensin esplicar, d’aquel home col que se llevaba mui bien pero al que nunca nun entendió del too.
Trátase d’un novela que fuxe de les grandes ciudaes, del tráficu y la polución pa centrase nuna ñatura cuasi intocable, o intocada, virxen talo que si’l tiempu nun pasare, onde Trond, el protagonista, asonsaña a Robinsón anque tenga a tiru piedra a otru vieyu cascarrabies col qu’entama una curiosa amistá. Por embargu, lo más prestoso nun ye la historia que se nos cuenta, que tamién, sinón la forma de contala. Con pausa, dexando esboligar les pallabres que van formando frases que van formando párrafos. Ensin esfuerzu. Igual por eso me prestó tanto lleéla depués de tanto pelmazu que camienta qu’escribir ye adornar la realidá, cuando a la realidá nun fai falta adornala, yá vien asina de fábrica. Tal y como lo entiende Per Petterson.
