Diba pocu tiempu que lu viere. Fue nel Antiguu Institutu na presentación d’un llibru de Sánchez Vicente, el so amigu del alma. Pero anque tuviere pasao muncho más tiempu, siempre recordaré la so figura seria, bien vestida, reflesiva, poniendo un puntu de cordura en cualquier discusión o comentariu. Nun puedo dicir que fuere mui amigu suyu, anque los nuestros pasos caminaron per caminos bastante xuntos. Él, más mozu, principió a trabayar en Conceyu Bable-Xixón cuando yo yá lo taba dexando, anque tengo perequí la so ficha d’afiliáu de los primeros años. Home mui preparáu, nunca nun tuvo afán de protagonismu lo que quiciás produxo que nun fuere más reconocíu a nivel socio-políticu, pero los que collaboraron con elli saben (y cuenten) de la so valía personal. Da muncha murnia que vaya morriendo tanta xente que lluchó dientro’l campu del asturianismu ensin llegar a ver una de les reivindicaciones cimeres de toos nosotros: la oficialidá de la llingua asturiana. Él tampoco algamó a vela. Habrá que tenelu en cuenta pa cuando daveres se llogre. Siguirimos lluchando por ella anque namás seya por los que van quedando pel camín. Descanse en paz Xesún Cañedo, un de los meyores.
(Semeya del Diariu El Comercio)
