Yá sé qu´ésti ye un tema pasáu de moda, depués de tantos años d’intentos toos ellos esbayaos venir a estes altures pidiendo un partíu asturianu paez que nun tien sentíu. Si darréu de la Transición, nos años siguientes en que l’asturanismu afervollaba, en que se llogró allevantar non un, sinón hasta tres partíos al empar, si daquella nun hubo manera de xunise en defensa de los intereses sagraos d’Asturies (perdón polo de sagrao, ye una forma de falar), si pudieron más les pequeñes miseries, los personalismos, los maximalismos o cualquier otra disculpa pa que nun cuayara esi partíu qu’aconceyera a los que nos llamamos «asturianistes», si la historia fue asina, qué sentíu tien reclamar agora a esi inesistente partíu asturianu pol que munchos lluchamos va tiempu. Pero ye que da tanta pena ver cómo los partíos exemónicos na nuestra tierra obedecen dafechu a les voces de fuera, a los intereses de fuera, a les órdenes de fuera… ¡Da tanta pena! Sentir que la lideresa del PP ye descabalgada polos que manden en Madrid, que nun hai un solu asturianu na executiva qu’acaba formar Feijoo con políticos de toles demás comunidaes. Que tampoco nun hai, como n’otros llugares, un Partíu Socialista Asturianu (hailu Catalán, Vascu, Galegu, Valencianu…) pues equí siguen conformándose con llamase «Federación Socialista Asturiana». Que Podemos se desfái en lluches fratricides. Qué Ciudadanos ta a piques d’esapaecer, en crónica d’una muerte anunciada. Que Foro nun fue a dar esi pasu alantre que lu oldearía con l’asturianismu, al nun votar en favor de la Oficialidá cuando pudo… ¡Da tanta pena! Que nun haya esi partíu propiu, que defenda los nuestros intereses ensin que naide de fuera venga equí a meter les manes, a manipular, a rebaxar, a caciplar, a escaecer la nuestra Historia, llingua, vezos… En fin, perdonái esti pequeñu desfogue. Prometo que nun volverá a pasar. Sobre too porque la culpa que tenemos nosotros nun podemos echá-yla a naide más. Ye verdá, pero ¡da tanta pena!
Un partíu asturianu
