Asina, namás. Con dos lletres del abecedariu quedaba marcada a fueu nel nuestru maxín d’aquellos años de xuventú. Nestos caberos meses morrieron unes cuantes de les nuestres namoraes de tola vida. Y fue naquellos años, xustamente, porque llueu un yá pierde eses ilusiones de quedar prendáu d’una mocina del cine. O seya, que nos facemos mayores. Tovía nun había televisión, y si la había yeren aquellos programes perroneros en blanco y negro que resultaben infumables, por más qu’agora dalgunos tengan señaldá hasta del NODO.
Dixi nalgún otru comentariu que Diane Keaton yera pa min l’amiga cola que tomar una copa y charrar selemente y que Claudia Cardinale sería la muyer cola que me casaría o, polo menos, compartiría la mio vida. Pues bien, Brigitte Bardot yera la persona qu’encendía’l nuestru primixeniu erotismu. Aquel averamientu a lo sexual cuando solo esa pallabra yá yera pecáu. Tardamos abondo en poder vela na pantalla, pol puritanismu de la dómina y porque nun la comparásemos con les muyeres d’aquellos ministros que salíen nel noticiariu, y que yeren más bien rancies. Asina que teníemos que conformanos con unes postales sacaes de nun se sabía ónde, llevando un bikini que tampoco nun llegare a les nuestres playes. Un día que xugamos un partíu col Colexu escontra un rival de la capital (d’Asturies, non d’España) fuimos llueu a ver una peli al Campoamor, cuando tovía se poníen pelis nel Campoamor. Nun recuerdo’l títulu, pero yera bastante «ñoña» y a la B.B. nun se-y veía nin la rodiya. Asina y too trescendía d’ella esi erotismu que nos ablayaba, o igual yera que lo imaxinábemos más que lo veíemos. Tuvo de pasar un tiempu hasta que la pudimos contemplar en «…y Dios creó a la mujer», envidiando a aquel cara dura que fue Roger Vadim que, como yera direutor y tenía perres, podía contemplala cuando quixere. La verdá ye que los años ficieron a la B.B. avieyucar mal, a la escontra d’otres como la mio siempre almirada Romy Schneider que siguió siendo guapísima.
En fin, que se morrió la B.B. y unu queda un poco más güérfanu d’aquelles suañaes estrelles que formaron parte del nuestru firmamentu adolescente. Que la tierra-y seya suavina a una de les que más me gustaron.
