El veteranu grupu “Telón de Fondo”, cuya alma mater son Lluis Antón González y Xuliu Vigil, repunxo la obra “Splash”, d’Ernesto Caballero, nel marcu del Festival del Arcu Atlánticu, y nel llocal del Antiguu Institutu Xovellanos. Como en toles actividaes d’esti festival, absurdamente criticáu por dellos grupos municipales sólo porque nun lo inventaron ellos y quita protagonismu a la “cultura de fritanga”, el llenu taba aseguráu. A tal puntu que, como llegué un par de minutos tarde, tuvi que m’asitiar nel incómodu llugar del primer pisu, qu’arrodia al patiu central del institutu. D’esi mou, nin la visión nin l’audición resultaren afayaíces, cola suerte que ya tuviere vista la obra va un tiempu nel Xovellanos, colo que fui a siguila de mou aceutable.
Nel intre te dabes cuenta de que’l públicu asistente nun yera l’avezáu, con gran predominiu de foriatos que, en cualquier casu, siguieron la obra nun respetuosu silenciu y riéronse nos momentos que la representación lo pidía. Eso quier dicir que la llingua nun fue un trabancu pal esfrute del espectáculu. Ye más de lo que-yos pidimos a unos cuantos políticos asturianos, dafechamente enfrentaos al asturianu y a tolo que representa.
Los tres actores tuvieron mui nel so papel, con soltura y espresividá, anque pal mio gustu un poco cortes de voz les dómines, teniendo en cuenta que’l llugar nun atropa les condiciones acústiques mínimes pa esti tipu representaciones. Polo menos pa los que tábemos un poco lloñe. Non asina Lluis Antón, al que se-y entendía perbién y, como siempre caltuvo un gran nivel ganándose los aplausos del llamáu “respetable”. En fin, un nuevu ésitu popular de “Telón de Fondo” que siempre fai méritos pa que los poderes públicos lu axuden con más enfotu de lo que lo faen. Y ésitu tamién del propiu Festival del Arcu Atlánticu que, pese a la enemiga de dalgunos, sigue cuntando los sos actos por llenos. Qué quedrán…
