La representación nel Teatru Xovellanos de Llázaro de Tormes, una adautación al asturianu de la famosísima obra del sieglu XVI, hasta va pocu tiempu d’autor anónimu, y agora atribuyía a don Diego Hurtado de Mendoza, supunxo la consagración de Carlos Alba «Cellero» como actor d’amplísimu rexistru.
Porque’l monólogu construyíu alredor de la novela cola que s’anicia’l xéneru de la «picaresca», viéno-y como aniellu al deu pa qu’esti interprete avilesín desplegare tolos sos recursos interpretativos, yá apuntaos estos caberos años na utilización del monólogu asturianu. Y ye que, a lo llargo de la hora y media que dura l’espeutáculu, «Cellero» enllena l’escenariu col so bon facer. Un bon facer que comprende la voz, el xestu y l’espaciu escénicu. Una voz que llega fuerte y enllena de matices a les últimes files del teatru (nosotros tábemos na penúltima fila), con una dicción clarísima na que nun se pierde nin una sola pallabra. Un xestu matizáu, apropiáu al testu que se ta cuntando, faciéndo compliz al espeutador colos movimientos que va faciendo, y una forma de ocupar l’espaciu escénicu con unos recursos mínimos: un carru, una vara d’ablanu, una montera… Un carru que ye una especie d’arca del tesoru, d’onde van saliendo xarres de vinu, madreñes, capes y hasta un ravel. Una vara que lo mesmo sirve como bastón de ciegu, como garrote, o como espada d’escuderu. Y una montera picona que se tresforma en gorru d’obispu, en sombreru de xuglar o no que faiga falta pa complementar al personaxe cuando lo necesite. Esi ye tol arropu escénicu que necesita Carlos Alba pa facenos revivir, una vuelta más, les aventures y desventures de Llázaro de Tormes y la so llucha por matar la fame y poder siguir viviendo.
El testu asturianu préstase perfechamente pal llucimientu, evitando pallabres o espresiones que quiten frescor a la dicción, y emplegando un llinguax cenciellu que nun «rechina» nada na voz y la pallabra del personaxe. El teatru nun taba enllenu (habría unes tres cuartes partes) y siéntolo muncho porque los que fuimos pasámoslo perbién, y asina-y lo demostramos a esti actorazu que ye «Cellero» coles ovaciones que-y dedicamos. Y ye que nin el mesmu Rafael Álvarez, «el Brujo», pudiere facelo meyor. Con eso ta too dicho.
