Asistí’l sábadu 28 al actu d’entrega de los Premios Timón d’esti añu 2013. Volvió, como’l día anterior, a haber muncha xente nel Patiu del Antiguu Institutu, anque sigo echando en falta a munchos amigos y asturianistes en xeneral que, polo que fuere, nun valoren l’asistencia a estos actos sociales que, pa min, dan-y muncha visibilidá a la llingua. Xusto dalgo de lo que carecemos. Pero bono, allá caún.
Recibió’l premiu, en primer llugar, el mio amigu y almiráu Miguel Rojo, candidatu d’otros años y qu’ésti, a la fin, recibiólu merecidamente. Tuvo, como ye avezao n’elli, simpáticu y ocurrente, faciendo una especie de «diccionariu» de pallabres personales a les que-yos dio un sentíu propiu. Mui prestoso. Llueu l’escritor y, sobre too cineasta, Gonzalo Suárez recoyó’l suyu. Llevamos un pequeñu sustu cuando, al querer xubir al estráu, zarapicó y a puntu tuvo de cayer embaxo. Una vez recuperáu, dio encesamente les gracies y aprovechó pa falar sobre la profesión d’escribir, últimu abellugu, dixo él, de llibertá pues con un papel y un llapiceru yes a contruyir la historia que quieras. Una profesión que comparó cola del boxeador que boxea cola so propia solombra y, dacuando, ye ésta la que gana. Pa lo cabero, entregóse-y el premiu, nuevu d’esti añu, al representante de l’Asociación Cultural Ensame Sidreru, Marcos Abel, pol so llabor en pro de la «bebida nacional», y la publicación de la guapa revista «La sidra» que va yá pol so décimu aniversariu.
Enantes y depués de la entrega de los Timón, intervieno la Coral Polifónica Xixonesa. Llevo munchos años (dende la dómina de don Anselmo Solar) siguiendo a esti maraviosu grupu y tengo de dicir que tuvieron una actuación cuasi perfeuta, y digo «cuasi» por nun dar el 10 que, como dicía un vieyu profesor del institutu, sólo se-y pue dar a Dios. La so interpretación de «Como la flor», del maestru Torner, fue, sinón como Dios, polo menos como los ánxeles. Norabona al veteranu grupu xixonés (que nun diga’l mio amigu y bon cantante Falo que los critico). Y pa finar l’actu, volví a ver al gran Cellero interpretar al so «Llázaru de Tormes» y, como’l día que lo estrenó, volví a antroxar cola so actuación. Cellero, como’l tamién grandísimu Dani García de la Cuesta, yá lo dixi n’otres ocasiones, son un verdaderu luxu pa la cultura asturiana y cada vuelta lo faen meyor. Ánimu y alantre, amigos Carlos y Dani. Y felicitar, como tolos años, a l’Arribada por seguir faciendo les coses a les dereches, llevando’l Timón bien garráu. Tienen un méritu pergrande.
(Semeya Paloma Ucha)
