Ye Miguel Rojo un escritor prolíficu. Prolíficu y, al tiempu, variáu. Nes sos caberes entregues hai poesía, teatru y narrativa y tamién exerce la crítica lliteraria dende les páxines d’ún periódicu llocal. Escribe, amás, lo mesmo n’asturianu que’n castellán, anque me paez que lo más cabero que tien ye d’esta segunda llingua, dicho esto namás nel sen informativu pues pa eso presumimos de ser billingües. Yo tamién lo exerzo.
Llega agora a les llibreríes (bueno, va ya un tiempín) una novela xuvenil de títulu «La colina del Minotauro», y fáelo de la mano de la editorial Pintar-Pintar nuna cuidada edición como suel ser davezu nesta empresa. Trátase d’una entretenida historia d’aventures, plantegada en dos escenarios mui diferentes, anque socesivos nel tiempu. Un primeru que se desendolca nel País Vascu, xustamente en Bilbao, naquellos escuros años de plombu cuando ETA mataba a tol que nun se plegaba a los sos intereses separatistes. N’esti casu a un profesor d’Universidá, arqueólogu, y padre de familia con muyer y dos fíos -neñu y neña- un de los cualos ye’l protagonista de la historia. Iñaki, de doce años.
Nuna pequeña nota d’aniciu, l’autor cuéntanos que la novela escribióla nel añu 2004, cuando la banda terrorista tovía alitaba con puxu, y que la unvió a delles editoriales pero nenguna s’atrevió a publicala. Como sabemos, yera perdifícil tocar esti tema ensin ganate la enemiga de según qué personaxes. Llóxicamente, la historia tendría munchu más sentíu nel momentu en que foi escrita, anque nun por ello pierde interés lleela agora, vente años depués, peñerada per tolos aconteceres qu’hubo dende entós.
El segundu escenariu ye la islla de Creta, a onde tienen que fuxir los protagonistes vascos, en cata d’una seguridá que nel so país yá nun teníen. Y ye nesti segundu escenariu onde la novela garra más puxu, dende’l sentíu de l’aición y l’aventura, y onde conocemos meyor a Iñaki y al so recién amigu Tasos, fíu de la direutora de la escavación na que va a trabayar el padre del primeru. Una aventura al rodiu d’un personaxe mitolóxicu (el Minotauru), que va a da-yos a los dos amigos más d’un sustu. Nun puedo destapecer más, claro.
Ye, pues, una novelina que se llee, primero con interés y llueu con esfrute, un poco na llinia d’aquelles clásiques aventures de «Los cinco», na que tampoco falta l’ayuda d’un perru que va a xugar un papel mui prestosu. Dame la impresión de que, pol final, un poco abiertu, pudiere haber una continuación de la mésma. Si ye asina, seguro que va a interesanos. Polo menos a min. Un bon regalu pa estes Navidaes.
