Dalgo tien Arnaldo Otegui que me cae mal. Nun sé si ye lo que diz, cómo lo diz, o la so propia «planta» a la hora dicilo. Ñidiamente nun ye pola so ideoloxía, cola que nun comulgo (nin confieso) pero que por sí sola nun me daría pa tene-y esa manía, ye daqué más químico. Falta d’empatía o de simpatía.
Sal agora de la carcel, depués d’una estancia de seis años y mediu por collaborar con ETA. Nun seré yo’l que ponga en dulda tal cosa pues, anque dalgunes veces cueste un poco creyelo, tamos nun estáu de derechu. Pero a lo que voi ye que, les imáxenes y el discursu que sentí del actu públicu nel que los sos amigos lu recibieron, sonáronme un poco como sacaes de la serie del «Ministeriu del tiempu». Les frases, les postures, l’ambientación, retrotrayéronme a otres dómines onde la ETA y los sos simpatizantes tovía metíen mieu. Sólo qu’agora tán como desenfocaos, como fuera de tiempu.
La ETA esapaeció práuticamente -anque guarden entovía lo del desarme- y lo que siempres se llamó «el so entornu»
pierde puxu de mou ñidiu. Y ye que, a la velocidá que pasaron estos caberos seis años y mediu, nun ye d’estrañar qu’Otegui y los de só quedaren atrasaos. Polo que sabemos agora del País Vascu, ultimes encuestes, los más mozos ven toa esa historia d’ETA como dalgo del pasáu, dalgo obsoleto que nun tien nada que ver cola so vida y les sos preocupaciones d’anguaño. Pero nun son sólo unes encuestes. Nes últimes eleiciones, el llugar qu’ocupaben los partíos nacionalistes radicales ocupólu Podemos o otres fuercies propies d’esi mesmu calter, al puntu que Bildu, heriede de les esencies polítiques más proetarres, pasó de tener siete diputaos a solamente dos. Abúltame qu’eso ye mui bono, pues dende va yá munchos años, demasiaos, la política vasca movíase cuasi esclusivamente al rodiu del tema del terrorismu y los terroristes. ¿Quier eso dicir que finó’l nacionalismu vascu? Nin muncho menos. Lo que yo quiero entender ye qu’hai una nueva forma de facer política, nel que l’independentismu va a ser una más de les ideoloxíes que pacificamente se confronten na sociedá vasca. Con tou derechu.
Poro, les imáxenes de la salida de Arnaldo Otegui de la carcel, y l’actu qu’ellí se montó polos sos fieles y los fieles veníos d’otros llaos, antoxáronseme como dalgo «demodé«, como una cosa antigua, agostada, anque nun-yos quito la capacidá que puedan tener pa remanar esa parte de la sociedá, cada vuelta más pequeña, arreyada entovía a unos esquemes de «guerra fría». Sinceramente creo que la sociedá va per otru llau.
