Dicir que «Patria» ye la meyor novela sobre’l mundu d’ETA nun ye dicir demasiao, la mayoría de la xente que la lleó podría tar d’alcuerdu conmigo. Retrata, paezme que con fidelidá, la vida nesos pueblos pequeños del País Vascu onde «Euskadi Ta Askatasuna» tenía a la xente acoyonada y tremerosa de nun ser señalada pola banda terrorista porque entós yá taba perdida. El vacíu al so alredor, el mieu a salir a la cai a la espera del tiru na nuca, y si non, la muerte en vida porque naide va a querer rellacionase contigo, anque seyas vascu, fales euskera y na to pequeña empresa dés trabayu a unes cuantes persones del pueblu, como yera’l casu del Txato Lertxundi, el padre de familia asesináu na novela de Fernando Aramburu. Novela honrada, de llectura apasionante y con dos protagonistes femenines (Bittori y Miren) de les meyor diseñaes de tola lliteratura.
Lleí dalguna otra novela d’Aramburu, creo qu’anterior a la que comento, que m’entretuvo ensin alcanzar el nivel y la intensidá d’ella. Tán reseñaes nesti blogue. Y agora fáigome col caberu llibru que publicó, sabiendo que ta ambientáu nos cuatro díes que van, del secuestru, al asesinatu de Miguel Ángel Blanco, prósimu a cumplir -pal añu 2027- los trenta años.
Pero, quiciás porque esperaba muncho d’ella, «Maite» ye una novelina corriente, que cuenta la rellación d’una madre que vive en San Sebastián, coles dos fíes que tien. Una que reside na mesma ciudá y que ye la que mayormente la cuida, y otra que vive nos Estaos Xuníos y que vien a pasar dellos díes con elles depués de 13 años d’ausencia. Lo que se nos cuenta d’esta rellación nun tien, pa esti qu’escribe, munchu interés, dibuxando unes pequeñes vides burgueses onde nada paez tener demasiada importancia. Una fía casada con un oftalmólogu del país, la otra casada con un americanu que paez sacáu de l’América profunda, que se cuenten dalgunos recuerdos de la infancia compartida, como tantes otres asemeyaes. Pequeñes infidelidaes matrimoniales, y una cariñosa rellación con su madre pues el padre morrió va tiempu.
¿Y lo de Miguel Ángel Blanc0? Pues, un socesu tan decisivu na marcha de la guerra escontra ETA, queda namás como un telón de fondu d’unos socesos triviales que son los qu’en verdá se cuenten. El secuestru y asesinatu queda n’escuchar un poco la radio o ver dalgún telediariu onde ta contándose lo que va sabiéndose. Talo que la música de fondu cuando entres nun supermercáu o aquello que se nomaba «filu musical». Nun hai, o polo menos yo nun lo vi, un afondamientu nel tema, nin siquier a nivel de respuesta de la xente, masque se facíen manifestaciones y que la hermana menor, la de casa, llevaba un llazu azul en bolsu por si dalgún día lu ponía… si nun había peligru. El tiempu de la novela pasa en coses menores: comprar, cocinar, pasiar pela ciudá, charrar de coses ensin importancia. Hasta se nos da dalguna receta, asonsañando aquelles noveles de Pepe Carvalho, del gran Vazquez Montalbán.
Dos coses tien la narración d’Aramburu que pretenden ser novedoses. Una ye que Maite, la protagonista, dacuando fala consigo mesma como si tuviere falando con otra persona, y asina espón los dos puntos de vista. Y ella mesma tien, tamién, una especie de visiones de coses que ve como nun suañu. Un «castillu», lo llama ella. Mui pocu equipaxe pa una novelina bien escrita, pero falta de tensión, de garra, tolo que-y sobraba a la gran novela que ye «Patria». «Maite», por contra, creo que nun pasará a la historia de la lliteratura, nin siquiera a la del propiu Fernando Aramburu. Igual ye que tenía’l «llistón» mui altu.
