Nun avezo a escribir de política nesti espaciu, masque dalguna vegada que falé de política municipal pa criticar a la nuestra alcaldesa de Xixón, qu’atropa cuasi toles carauterístiques que me repunen: ye bocayona, autoritaria, desconoz la realidá y la historia de la ciudá que dirixe, nun tien nengún sentíu del humor… fiédeme hasta la pinta que lleva cuando va como alcaldesa, ye dicir, en representación de tolos xixoneses, Caún pue vistir como quiera, faltaría más, pero cuando se representa a un organismu públicu hai que dir un poco curiosa, eso va col cargu. Pero bueno, too esto yá lo tengo dicho y nun ye cosa de repitilo (lo cuál resulta paradóxico porque acabo de facelo)
Hoi quería amosar tamién el mio repunamientu (nun sé si esiste la pallabra) pol grupu de Podemos. Yá digo de mano que los tengo votaos en delles ocasiones (dalgunes recientes) o seya que creo que nun tenga que demostrar nada, cosa qu’en nengún casu diba a facer, claro. Pero ye que tamos llegando a un puntu ensin retornu na credibilidá política d’esta xente. Nun sé qué coño-y pasa a la izquierda que paez empeñada en regala-y el poder a la derechona. Asina asistimos a les socesives divisiones en grupos, grupúsculos, corrientes d’opinión y personalismos varios que llega un momentu nel que nun sabemos quién ye quién. Quién son los buenos y quién los otros. N’Asturies tenemos munchos exemplos, pero’l problema ye de carauter xeneral. La política qu’apliquen los «podemites» (¡qué pallabru más feu!) ye la del Harakiri. Y llueu ta’l tema de los que nin faen ni dexen facer. Asina, por necesidaes del serviciu (del PSOE) y por méritos propios, Podemos fue imprescindible pa formar un gobiernu de coalición. Bien, pues que gobiernen. Discutan les sos propuestes onde lo hai que facer, nel senu del Gobiernu, influyan nes decisiones que se tomen, convenzan de les sos teoríes, propuestes o como quieran llamalo. Pero una vuelta que, como Gobiernu, se tome una decisión hai que ser consecuente con ella. Nun se puede tar nel Gobiernu y nes barricaes escontra’l Gobiernu. Eso nun ye serio. Si nun son capaces d’aceutar lo qu’ellí s’apruebe, si atenta escontra los sos más elementales principios, si tienen qu’asumir dalgo que nun pueden, dimitan. Dexen el Gobiernu y pasen a la oposición. Seyan coherentes, nun se pue tener too.
Yo fui de los que voté «Otan Non, Bases fuera». Nun puedo demostralo, tendrán que creyer la mio pallabra. Y por eso tuve munchu tiempu ensin creyer nada de lo que’l PSOE proponía, porque nos engañaron con aquello. Pero agora, depués de tantu tiempu y colos rusos en guerra con Ucrania nun tengo tan clara la posibilidá de ser neutrales, que yera lo que se pretendía. Seguro que la OTAN, o polo menos los EE.UU, tienen tamién la so cuota de responsabilidá no que ta pasando agora, pero’l tal Putín paezme un dictatorzuelu de pacotiya, eso sí, con munchu poder y bastantes perres. En cualquier casu esi ye otru debate nel que nun quiero entrar. Lo que yo critico ye que si se ta na OTAN, habrá que cumplir coles les regles qu’haya y aprobar los acuerdos que se tomen nel conxuntu, anque puedan non prestanos. Y si non que pidan direutamente la salida. Pero si s’alcuerda llegar a un gastu militar del 2% del PIB, nun plazu concretu, nun puede llueu rechazase publicamente esa inversión diciendo que s’empobine, por exemplu, a coses sociales. Val, queda mui bien, pero esa señora Belarra que lo propón ye na menos que Ministra del Gobiernu y ellí ye onde tien que defendelo. ¿A, que sí, que lo defendió y nun-y fain casu? Pues que dimita, que ye lo honrao, non tratar de menoscabar les decisiones del Gobiernu favoreciendo los ataques de la derecha. Si ye Gobiernu, que lo asuma. Y si nun pue asumilo que dimita. Tan fácil como eso. Y yá nun vuelvo a escribir de política hasta que la nuestra alcaldesa vuelva a meter la pata. O seya, de seguida.
