Que nun se diga que non avisamos con tiempu. Cuando sentimos polos medios de comunicación qu’esta señora, Ana González, presentábase a les primaries municipales por parte del PSOE, col sofitu del aparatu oficial, diximos por activa y por pasiva que nun yera la persona afayadiza. Mala xestora (fízolo fatal cuando fue Conseyera d’Educación, Cultura y Deportes), malencarada, prepotente y nin pizca dialogante, sumábase a ser foriata y desconocer el calter, la forma de ser y la historia d’esta ciudá milenaria que ye Xixón. Nun conocía nin les cais, como ya xustifiqué n’otra entrada.
Doña Ana ye de les que primero dispara y depués entruga, asina yá tuvo d’envainásela en delles ocasiones nes que charró y anunció… y llueu tuvo que rectificar o dexar la cosa como taba. Pero esta última metedura de negase a proponer a la Universidá Llaboral, como Patrimoniu de la Humanidá, yá rebosa’l vasu. Porque nun pue haber argumentos más simplayos que los que caltién la señora González y los sos «adláteres» (prestame abondo esta espresión acuñada por José María García), cola connivencia «tancrediana» (de don Tancredo) de los amigos de Podemos. A IU nun los cuento porque-yos dieron una gorra y un xiblatu y anden como llocos «movilizándose».
Según esta xente, nun pue promovese al edificiu diseñáu pol gran Luis Moya a ser Patrimoniu de la Humanidá polos sos oríxenes fascistes. Fue construyíu a mayor gloria de Franco. Claro, como’l noventa y nueve por ciento del restu los edificios, monumentos, ilesies, pirámides, y un llargu etcétera qu’hai nel mundu. ¿Quier dicinos esta señora y los sos fieles que namás a lo que se construyó en democracia pue reconocése-y el so valor artísticu o representativu d’una época. ¿Pa quién se llevantaron les Pirámides d’Exiptu, feches amás por esclavos? Pa quién pintaron Velazquez y Goya los sos maraviyosos cuadros que cuelguen nel muséu del Prado pa arguyu de tolos españoles? ¿Y el Prerrománicu asturianu nun se llevantó pa mayor gloria de reis y monxos, o seya la la opresora ilesia católica? ¿Qué facemos, devastámoslo too, esperamos a que esbarrumbe? Y ye que la inorancia ye mui atrevida, y el sectarismu muncho más. Dame vergoña considerame d’izquierdes y tener que ver lo que voten los que tamién se llamen asina.
Y una cosa más. Lo de la señora Ana González ya lo anuncié va tiempu, pero l’actitú de la xente de Podemos, dalguna a la que tenía en gran consideración, ye un seguidismu absurdu y paletu a una decisión que, sinon diere pena, daría la risa. Yá lo dixo l’otru: «L’enemigu ta dientro, disparái sobre nosotros».
NOTA.- Tres díes depués de tener colgada esta entrada (el día 16), l’alcaldesa da marcha atrás y apúntase a pidir pa la Llaboral ser Patrimoniu de la Humanidá. Como siempre, mete la patona y depués quier sacala, lo que reafirma tolo que dixi enantes. Agora los que queden col «culu al aire» son los de Podemos. Eso pása-yos por dir con males compañíes en llugar de pensar por sí solos. Los xixoneses, como nel anunciu, nun somos fatos (bueno, dalguna vez sí)
