Premiu Nacional d’Edición.- Esti añu, por primer vez, el «Premio Nacional de Edicion» que destaca al llibru meyor editáu n’España admite tamién a los escritos n’asturianu. Tengo l’arguyu de que seya un llibru míu’l que se presente a esi prestixosu premiu. Hai que dicir que’l gallardón va empobináu non al autor, sinón a la editorial, nesti casu Pintar-Pintar que presentó la biografía de “Xosefa de Xovellanos, la dama ilustrada de les lletres asturianes”, con testu míu y dibuxos d’Ilemi Cuesta Mier. Lo más fácil ye que, a la vista les editoriales que compiten, nun s’algame dichu premiu, pero abúltame que con tar ehí yá ye abondo. Polo menos pa esti modestu autor.
La señora alcaldesa.- Por causes personales va munchu tiempu que nun escribo nada nesti blogue, pero tal paez que’l tiempu nun pasare. Hai que siguir falando de la peor alcaldesa de la democracia, incluyendo a homes y muyeres. Prepotente, inorante, primero mete la pata y depués tien que se desdicir… nun hai tema nel que nun amuese’l gran erru que tuvo’l PSOE proponiéndola pa un cargu pal que nun ta preparada. Namás habría qu’esperar que nun repitiere mandatu porque, casu contrariu, el partíu n’Asturies va siguir el camín del de Madrid. O seya, al “cagayán”.
Venta de llibros n’asturianu.- Dellos autores y críticos de la nuestra lliteratura quedaren un poco ablucaos al conocer los llibros más vendíos a lo llargo del añu 2020. Munchos escritores afamaos y munchos premios renomaos nun apaecen per nengún llau. Igual ye qu’ellos anden per una parte y los llectores per otra, o que nun ye oru tolo que relluz. Ye un tema que daría pa un discutiniu anque nun siempre les ventes espeyen la calidá de lo que s’escribe. Pero, eso sí, habrá qu’escribir pa dalguién ¿non?
El polvorín mundial.- El mundu sigui siendo un polvorín. Agora son otra vuelta Colombia y Palestina les que se desangren nunes guerres que se llamen llocales pero que, en realidá, son internacionales. Les grandes potencies, sobre too en Palestina, anden metiendo les manes p’asollar el fueu y llevar a la muerte y la desesperación a miles de persones. Camentaba qu’esti nuevu Presidente de los EE.XX. aportaba con aires nuevos a la Casa Blanca, pero la so cínica actuación nel sofitu ciegu a Israel vien a dicir que’l “lobby” xudíu sigui mandando muncho nesi país. Y que l’esterminiu d’un pueblu nun interesa demasiado al «amigu americanu».
