De la mano del siempre inquietu y plurifacéticu escritor, Antón García, aporta al panorama cultural asturianu una nueva revista que lleva por nome «Campo de los patos». Trátase d’un volume «gordu», de cuasi 400 páxines, qu’inclui, según s’amuesa na portada, los dos primeros númberos de la revista. La periodicidá de la mesma paez que va ser añal y’l so conteníu, sinón dafechamente monográficu, si con un ampliu dossier temáticu, compartiendo espaciu con coses más propies de la nuestra cultura. Esti primeru ta empobináu a la Cultura Xermánica y hai nel, ensayu y traducciones.
El director de la revista, el propiu Antón García, desplica un poco nel entamu les intenciones de la mesma: «…Esta revista, que nun tien programa sinón propósitu, quier aprovechar esti momentu expansivu (refierse al de la lliteratura asturiana) y llevantar acta de la mirada que dende Asturies, y dende l’asturianu, s’echa al conocimientu universal, ofreciendo una plaza pal entendimientu de les cultures…». Per otru llau, la revista tien pensao incluyir les más clásiques actividaes lliteraries (creación, traducción y crítica), «pero vamos esforzanos pa dar voz al restu de les artes».
El garapiellu de collaboradores que contienen estos dos primeros númberos ye, amás d’estensu, mui cualificáu,
enllenu de nomes importantes dientro la nuestra lliteratura: Xabiero Cayarga, Roberto González-Quevedo, Miguel Allende, Marta Mori, Xandru Fernández, Xosé Gago, Vanessa Gutiérrez, Xuan Xosé Sanchez Vicente, Montse Garnacho, y unos cuantos nomes más, non menos interesantes que los anteriores. Los prósimos númberos que s’anuncien van dir dedicaos a la Poesía Norteamericana, y a la Cultura Asturiana Moza. Con toes estes blimes, de xuro que tien que salir un bon cestu. Asina lo deseyamos pol so bien, y pol de la cultura asturiana que ye, en definitiva, pa lo que trabayamos toos. Bienvenida.
