Asistí a la entrega premios «Timón» d’esti añu, nel vieyu Institutu que fue la mio casa, nun actu mui prestosu embaxo la direición del popular Alberto Rodríguez. Ya conocéis a Alberto, o lu quies o lu mates, yo prefiero querelu porque ye un actor enorme, un verdaderu showman, col que tienes que te reir a la fuerza, anque siempre se pasa siete pueblos.
Embaxo la so batuta, l’actu trescurrió ente sonrises, quiciás demasiaes, porque hubo delles coses qu’había que les tomar en serio. Como’l pequeñu discursu que pronunció Xosé Bolado, xunto con dos poemes guapísimos que quiero ver aína en papel pa poder antroxar con ellos. Aprovecho pa dicir que los premiaos d’esti añu fueron, el propiu Bolado na so edición n’asturianu, la querida y almirada Carmen Ruiz-Tilve, cronista oficial d’Uviéu, ciudá de la que lo sabe too, y cola que pasé dalguna simpática anéudota como un añu que teníemos un actu cultural, xunto con Carmen Gómez Ojea, na Caxa d’Aforros d’Asturies, y suspendímoslu porque yéremos nosotros tres y un borrachu qu’entró a atechase de la lluvia. Fuimos a tomar un café perellí cerque. Xunto con Bolado y Carmen, y nel capítulu d’asociaciones, a la siempre benemérita Xunta pola Defensa de la Llingua, que lleva tropecientos años (dende 1984, creo) lluchando pela nuestra llingua y preparando a nueves xeneraciones pa garrar el relevu de los vieyos. Tres premios, entós, merecidísimos, que recoyeron los sos destinatarios ente los aplausos de la xente, contenta con too, y col añadíu de l’actuación musical de Taranus que cantó media docena de guapes canciones. Mención especial pa esa xoya que ye l’añada «Agora
non», na que la voz de Susana púnxonos los pelos de punta.
En fin, qu’una vuelta más, norabona a l’Arribada por estos guapos premios que n’otros llugares del Estáu concitaríen l’asistencia d’autoridaes y escritores en plen0 y, por supuesto, tolos asturianistes qu’aprovecharíen pa facer actu de presencia social, pero qu’equí vamos siempre los mesmos, los que creemos que nun abasta sólo con glayar, sinón que tamién hai que participar de les nuestres coses. Pero en fin… allá caún cola so conciencia. O lo que seya.
