Esti sábadu pasáu cellebróse nel Salón d’Actos del Antiguu Institutu un homenaxe entamáu pol Atenéu Obreru de Xixón, al que fue sociu distinguíu y llueu presidente, Xose Bolado (ensin tilde, como yo lu llamaba) Asistieron autoridaes, como la Conseyera de Cultura y l’Alcaldesa de Xixón, familiares, y un grupu grande d’amigos y amigues, dalgunos de los cualos intervinieron emocionaos (como ye’l mio casu) falando d’estremaos aspeutos de la vida y obra del fallecíu autor. La comisión entamadora del actu taba formada por Luis Pascual, actual presidente, Emilia Vazquez, que fuere pareya de Bolado, y una de les socies fundadores del Atenéu y bona amiga que ye Paz Fonticiella. Al tiempu, fízose la presentación d’una antoloxía de la obra de Xose, que lleva por títulu: «Un pájaro tan ligero». De la edición, billingüe, encargóse la escritora y crítica Esther Muntañola que lleó dalgunos poemes a la fin del actu. Nun sería posible espeyar tola emoción qu’ellí vivimos, nin rescatar un de los trabayos qu’ellí se lleeron. Sicasí, a min fízome respigame lo que lleó Paz Fonticiella, un testu cenciellu pero tan guapu que quiero compartilu con vosotros, los que vos averáis a esti blogue. Espero que vos preste tanto como a los que tuvimos presentes nel Vieyu Institutu, rindiéndo-y homenaxe al gran amigu y bon escritor que fue Xose Bolado. Siempre na memoria.
N’alcordanza del amigu, Xose Bolado
Xose disfrutaba de les xuntances alredor de la mesa, y nelles amosaba la fascinación que sentía pol arte. Tratábase d’auténtiques puestes n’escena onde nun faltaba detalle, y too harmonizaba con vistosidá: los cubiertos, les copes, los adornos, el mantel… Verdaderu gozu pa los sentíos. Platos exóticos y llariegos, puru Festín de Babette, qu’animaba a conversaciones atentes, a la camaradería, a la provocación y a les bromes. Lo que surdía ellí, ellí quedaba. Lo que lo sofitaba too yera la bona intención.
Un día cercanu al d’hoi, un 11 d’abril de 2017, como siempre que diba a Madrid, tuvi con Xose. Nos nuestros alcuentros, al abrazu primeru, siguíalu el falar posao, y el ramu poníalu l’intercambiu de regalos. Los d’él propios del viaxeru incansable que yera, ayalgues de visites a anticuarios, detalles mercaos a la salida d’un muséu. Recuerdos finos y elegantes. Pero ente los d’aquella tarde primaveral, hubo ún que m’encoyó’l corazón.
Daquella, Xose yá andaba de médicos, y anque les palabres facíen por disimular y quitar importancia, nos güeyos y nel semblante había tristura. Aquel regalu taba diciéndome que’l tiempu fuxía, que l’arena cayía cruelmente. Fici por que nun se notara la punzada, nun quería aceptar lo que s’allegaba. Yera la primer vez que m’apurría dalgo nuevo, pero estrenao, festexao… tratábase d’un mantel.
Un mantel de llinu beige, con servilletes de dos tamaños, adornáu con piños de florines cencielles y colores variaos, xuníes en ramos qu’asemeyaben fexes de globos a puntu d’algamar el cielu. Tanto la pieza mayor como les más pequeñes taben enmarcaes por cinco vueltes de milenta patines, feches con croché, del color de la tela. Cuánta harmonía nes puntaes, cuántu procuru nel llabor. Nun se vía un filu sueltu y sí, munchu empeñu. Tovía anguaño, siguen viniéndome a la cabeza les palabres del amigu ante’l mio agradecimientu sentíu: “Tiénense demasiaes coses per casa”.
Los pocos años que siguieron, l’amistá fízose tovía más fonda. Hubo abondes llamaes telefóniques cuando los tratamientos daben tregua, cambiemos semeyes de lo cotidiano: de los respectivos gatos nos llugares más insospechaos, de la primer rosa mariella cada abril nel balcón d’Hortaleza, d’arcos pintaos sobre’l Cantábricu… Tamién hubo dalgún alcuentru más, non tolos queríos por cuenta la pandemia. Dalguna merienda pa l’alcordanza en casa d’Emi, na que les hores volaben ente confesiones, emoción, pruyimientos y dalguna decepción.
Agora, que s’avera’l cabudañu, cuando’l xestu sigue vivu y la voz resuena clara, yá va siendo hora d’abrir l’armariu, sacar el mantel y poner flores na mesa. Yá va siendo hora de celebrar el privilexu de l’amistá y d’amar el tiempu piadosu de la memoria.
Paz Fonticiella
