Ésta ye una d’eses ocasiones en qu’un quixere tar enquivocáu. Allá pel mes de xunu, traté’l tema del ébola que taba desarrollándose en tres paises africanos ante la pasividá de la llamada «comunidá internacional»: yera una cosa d’eses de negros, como’l dengue o tantes y tantes enfermedaes que pueblen esos paises desdexaos de la mano de Dios y de los homes. Namás la Ong Mélicos ensin Fronteres trabayaba ellí, creando hospitales de campaña y atendiendo a esa probe xente d’una epidemia mortal pa la que nin hai vacuna, nin tratamientu. A naide d’esi llamáu Primer Mundu-y interesó un tema que paecía que nunca-yos diba a afeutar.
Por si dalgún curiosu con interés nel asuntu qu’agora enllena portaes quier miralo, abasta con meter nel buscador qu’hai na parte superior del blogue la pallabra «ébola» y dar a «DIR». Ellí saldrán dos entraes, una del 28 de xunu y otra del 9 d’agostu onde esti qu’escribe denunciaba la pasividá del «mundu civilizáu» pa con aquellos paises, y alertaba del pelligru que suponía dexar correr les coses ensin facer nada: La última epidemia de la enfermedá llamada Ébola vien a amosar la debilidá de les actuales sociedaes modernes, espuestes a los virus, y que viven “nel alambre” ensin tomar les resoluciones afayaíces pa solucionar un tema que, d’estendese, podría causar una hecatombe. Afirmaba yo en xunu. Y más alantre: Guinea, Liberia, Sierra Leona y agora Malí, ven espurrise los casos d’Ébola con una velocidá de vértigu. ¿Ta lloñe esa parte del mundu? Cometeríemos un gran erru si lo pensáremos. Nun mundu cambiante, nel que la xente se mueve tanto, en cualquier momentu podemos tener casos de la enfermedá dientro la nuestra casa.
Pues esi momentu llegó, ya tenemos los casos n’España… y n’otros paises occidentales. La entruga del títulu nun ye ociosa. Porque los más de
8.000 casos rexistraos n’Africa nun encartiaron pa espertar les conciencies de la nuestra sociedá, pero abasta un solu casu n’España pa que la sensación d’alarma y de mieu s’asitie nos medios de comunicación y na propia xente. Podíemos pues dicir qu’un blancu (blanca, nesti casu) equival polo menos a ocho mil negros, nun ta mal la proporción. Si la cosa nun fuera tan seria, daría la risa ver a esos típicos tertulianos de la radiu y la tele glayando y pontificando sobre un tema del que nun tienen nin plizca d’idea. Que si la enfermera se punxo los guantes o que si se los quitó… Dicía, en broma, una conocida mía que si se trataba de quitar los guantes la meyor yera Rita Hayworth.
Llegóme ayeri, vía móvil, un comunicáu d’un supuestu microbiólogu, acompañáu de munches firmes, refugando la trayida a España de los dos misioneros infectaos. N’España -dicía- nun hai hospitales seguros pa eses emerxencies. Lo curioso ye que los de Mélicos ensin Fronteres tán trabayando nos raigaños del mal, nel orixe del virus, nunos hospitales de campaña muncho más precarios que tolos del nuestru país. Lo que pasa ye qu’ellos si conocen el mal, y saben los protocolos que daveres hai que siguir pa nun contaminase. Nun taría de más que, los responsables d’esa Ong se punxeren al mandu de la crisis española, reemplazando a estos inútiles que sólo saben echar balones fuera, y desplicaren les coses como tienen que ser.
Y ye que l’ébola, como enantes pasaba col sida, nun ye una maldición divina, son enfermedaes que s’orixinen en paises probes, ensin recursos nin atención de les opulentes sociedaes que viven encapsulaes nun mundu de piruleta, creyendo que por zarrar los güeyos la cosa nun-yos va a algamar. Pues yá ven que sí. Y lo curioso ye que, nesti tema, conozse perfeutamente la estructura del virus del ébola, y abastaríen unes cuantes perres pa tener vacuna y tratamientu, pero prefierse invertir les perres de los llaboratorios n’otres coses màs rentables. Igual agora que’l mieu ta derrompiendo les compuertes, apaezan les perres y les persones encargaes de facelo. Ye mui posible, anque eso nun va a iguar l’escaezu de los paises del Tercer Mundu que van siguir abandonaos a la suerte… Hasta que venga otru casu a espertanos.
