Cómo son estes coses de la realeza, llevantámonos un amanecerín con un rei y vamos a acostanos con otru. Nada de toos esos trámites aburríos y pesaos, en qu’hubiere que preparar unes elleiciones, presentar unos candidatos, facer un poco campaña, votar, recoyer los votos, proclamar al ganador… Esto ye too pola vía direuta: equí te pillo, y equí te mato. Bien ye verdá que, tres l’abandonu del so puestu por Juan Carlos I, entovía nun nomaron al so fíu Felipe nuevu rei. Oye, hai que guardar unos formulismos, que nun tolos díes abdica un monarca. Pero lo bono ye que yá sabemos el nome del ganador. Ye’l nuestru Felipe, al que van a añadi-y un VI pa que nun lu confundan con otru cualquiera de la dinastía. Podríemos facer un chiste fácil colo de: “Felipe, que te VI”, pero esti ye un blogue seriu y eses coses nun pinten equí. Y, la verdá, presta saber tan pronto’l nome del ganador pa evitanos los nervios y, sobre too, les encuestes, que cada día me repunen más y nunca acierten.
Total que’l Borbón grande marcha pal banquillu, a lo que paez lesionáu, y sal a sustituilu un de la cantera: Borbón II, como aquel estremu que tenía’l Sporting que yera Herrero II (entovía tien una peña nel so pueblu, Herrero, non Borbón).
Ye la hora, pues, de les allabancies, los parabienes y los “que-bien-lo-fizo” de la prensa canallesca (como la llamó nun
sé quién). Nel telediariu ya ficieron un rápidu “corriverás” de corresponsales nel que tolos Xefes d’Estáu y/o de Gobiernu dixeron dafechamente lo mesmo: Un gran paisano que salvo la democracia cuando tuvo en pelligru. O seya, que quedamos nel 1981. Nin enantes, nin depués hubo otra cosa notable. La pena ye que, amás, seguramente por despiste, na TVE diben poniendo unes imáxenes del Rei nes que se lu vía, primero xunto a Franco que lu miraba fitamente, y llueu delantre del Xeneral Armada, que fue’l so tutor y la cabeza visible del intentu de Golpe d’Estáu d’esi mesmu añu 1981. ¡Coime, pudieron escoyer meyor! Llueu, como pa compensar, dieron tamién aquella “chuscada” tan perrera de cuando-y dixo al venezolanu lo de: “¿Por qué no te callas?” que, a xuiciu d’esti qu’escribaya, taba bastante acertao porque, al marxe d’otres valoraciones nes que nun voi a entrar, el venezolanu yera bastante pesáu.
Dicen esos oportunistes de los partíos d’izquierdes, de Podemos, y de los sindicatos –meyor se metíen no suyo- que sería un bon momentu pa facer un Referendum sobre la Monarquía y la forma política del Estáu. Tienen razón, pero yo tengo pa min qu’esti ye’l peor momentu. Igual que cuando un paisano muerre resulta que yera bonísimu, cuando un rei abdica resulta tamién que yera bonísimu. Yo esperaría un poco a que pasare tou esti “glamour”, nun vaya a ser que pa una vez que ficieren un Referendum sobre Monarquía o República, lu perdiéremos.
