Dende cuasi los anicios, esti modestu blogue tien zarráu l’apartáu de los comentarios. O seya, guísolo yo y cómolo yo tamién. Ello obedez a delles razones, pero la fondera ye que considero a «trabayu de campu» como una especie de Diariu, onde voi anotando les coses que me petecen: la llectura d’un llibru, un comentariu de prensa, dalgo que me cuenta un amigu, una reflexón sobre dalgún tema… Llueu hai xente qu’entra nesi diariu, que nun ye de coses íntimes, claro, y llee lo que yo pongo, lo cual pa mi ye mui gratificante. Pero anque nun entrara naide, yo siguiría colgando coses del mesmu mou, porque me presta. En cualquier casu, y por si dalguién quier faceme un comentariu sobre lo qu’escribo, hai un apartáu que pon «Contautu», que llega’l mio corréu dixital.
Faigo esti preámbulu porque, dacuando, a traviés d’esi «Contautu», lléguenme delles notes al rodiu de la opinión que llanté sobre dalgún tema. La mayoría ye pa dame les gracies por destacar dalguna cosa o a dalguna persona, pero tamién me lleguen rectificaciones (como la d’una xuráu d’un Premiu Príncipe d’Asturies que camudé por otru), y dalguna crítica por dalgo que punxe. D’éstes, la mayoría d’elles llegáronme por un par de comentarios fechos cuando’l grupu municipal de Foro, recién llegáu al ayuntamientu, cambió al responsable del Festival Internacional de Cine, señor Cienfuegos, por otra persona de la so confianza. Nun recuerdo nesti momentu la lliteralidá de lo qu’escribí (podría miralo, claro) pero la idega yera que, en política, ye un vezu corriente que cuando hai un cambiu de partíu nel poder, al nivel que seya, el nuevu partíu que tien les responsabilidaes del mandu cambia los equipos del anterior, pa poner a xente de la so confianza. Y esto ye al marxe del llabor qu’esos equipos tengan fechu hasta esi momentu. O seya, anque tean faciéndolo mui bien.
Creo recordar que dixi (voi terminar mirándolo, coime) qu’eso yera una enquivocación, porque la másima en cualquier actividá tien de ser que lo que funciona hai que lo caltener, pero que la política tien otres lleis, y ye lo qu’hai. Y seguro que si el PSOE volviere al gobiernu municipal, llóxicamente fadría lo mesmo. Bueno, pues esto ofendió a muncha xente que me mando opiniones (siempre correutes, ye verdá) amosándome’l so disgustu. Esi Cienfuegos yera un fuera serie (sedríalo), y l’echalu del cargu una inxusticia (sedríalo tamién), lo cual nun contradicía lo que yo punxere, que yera otra cosa. Y hasta se fixo una concentración na Plaza Mayor en defensa del «defenestráu» y se faló (nun sé si se fizo) d’un «boicó» al Festival.
Agora resulta qu’aquel «paladín» cinematográficu, puestu nel cargu pol PSOE, ya inxustamente espulsáu, vien reclamando a los sos proxenitores la cantidá de 135.284,11 euros por, según diz, deudes ente 2006 y 2010. Dómina na que la so xefa yera, namás y na menos, que doña Carmen Veiga, la so principal valedora y que se fartucó de glayar contra «tamaña felonía» (la de la so espulsión). Delda que, anque contrayía n’ époques socialistes, tendría de pagar l’actual Ayuntamientu, casu de que ganare la demanda civil. Al tiempu que nos enteramos, si ye que lo entendí bien, qu’esi señor taba ensin contratu firmáu dende 2005 al 2010, colo cual la otra cantidá que pidi, por nun cumplir col «preavisu» enantes d’echalu, paez que nun tien xacíu, pues eses cláusules onde vienen ye, precisamente, nos contratos que se firmen. Nun pue esistir un «preavisu» ensin contratu, a nun ser como una «deferencia».
Yo nun sé cuál de les partes tien razón, pero dalguién nun sal mui bien paráu d’esto. Si tien razón el señor Cienfuegos, y el PSOE debiá-y dineru, la señora Veiga tien más cara qu’un sacu perres por tol escándalu que montó col cambiu de Direutor, mientres nun-y pagaba 135.000 euros que-y debía. Y si la señora Veiga tien razón, Cienfuegos ye un mentirosu de tomu y llombu y, amás un aprovecháu que quier cobrar en falso. Dame igual quien tenga razón, pero que s’esclarie. Y a la vista de tou esti enguedeyu hai una última cosa que me tien estrañáu: ¿por qué’l señor Cienfuegos nun dixo lo de la delda nel momentu en que lu echaron? ¿Paecería lo llóxico, non? ¿O hai más coses que nun se cuenten?