L’HORROR PERMANENTE DE LAMPEDUSA.- Como un goteru d’un enfermu terminal na UVI, siguen produciéndose los muertos nes costes de la islla italiana de Lampedusa. La llista continúa engrandando y los detalles prodúcennos unes voltures nes que vamos vomitar el pocu europeísmu que nos quedaba. Nun pue ser que los pescadores de la faza digan que nun quixeron socorrer a los náufragos, por mieu a que los detuvieren y multaren por aidar a unos inmigrantes illegales. Nun pue ser que la Comunidá Europea mire pa otru llau, como si la cosa nun fuere con ella y, por ello, pienso que los muertos qu’un día sí y otru tamién se producen nes costes qu’arrodien el so/nuestru territoriu «sagráu» pesen sobre la so conciencia. Yá se qu’eso son namás que pallabres porque los organismos responsables nun tienen conciencia. Asina que debemos ser los ciudadanos d’esa engañifa que se llama CEE los que-yos esixamos un poco de vergoña. O seya, si siguen poniendo torgues pa la entrada d’esa probe xente desesperao, polo menos que tengan unos sistemes d’auxiliu nel mar que funcionen. Nun pue seguir esta sangría de seres humanos a les puertes de les nuestres cases.
LA PELÍCULA DE CIENFUEGOS: DE MOCÍN A MALVÁU.- El nomamientu, a la llegada de Foro al ayuntamientu de
Xixón, d’un nuevu responsable del Festival de Cine de Xixón, sustituyendo al sempiternu José Luis Cienfuegos, provocó eso que se llama «ríos de tinta», «movilizaciones populares» y hasta un conatu de boicó encabezáu pol ínclitu Almodovar, siempre preocupáu polos problemes asturianos. Hubo dalguna xente de bona fe, y muncha campaña mediática, en defensa d’un xestor exemplar como mostraben al señor Cienfuegos. Inclusive a min, que nin me va nin me vien el tema, escribiéronme dellos ciudadanos por dicir nel blogue que ye normal que, al llegar un nuevu equipu de gobiernu a la ciudá, ponga a xente de la so confianza, lo cual nun quier dicir, claro, que la práutica seya bona. Lo normal nun tien porque ser lo bono. El casu fue que, pocu tiempu depués, apaecieron unes cuantes irregularidaes (por llamales de dalgún mou) nel sen de que’l queríu direutor del Festival, andaba ensin contratu dende facía unos años, y debíense-y unes cuantes mensualidaes. Al menos eso ye lo que diz Cienfuegos y abúltame que ta embaxo xuramentu. La so principal validora, la señora Veiga pa la que yera un santu y un martir, anda agora viéndose la cara con elli nos xulgaos. Paez que’l preciu del señor Cienfuegos sigue xubiendo. Agora pidi más de 140.000 euros de vellón. Igual ye que lu teníen qu’haber echao un poco enantes.
¿HABRÁ QUE PIDIR POLA SALVACIÓN DEL PAPA?.- Yá van un par de vegaes en que’l facha del Obispu d’Uviéu, señor Sanz, que ta faciendo bonu hasta aquel que coló d’equí pela puerta d’atrás (un tal Osoro), vien diciendo que lo que ta faciendo l’actual Papa Francisco nun ye nada nuevo. Que ye lo que siempres se dixo y que namás son coses superficiales que nun afeuten al fondu de los temes. Paezme que l’ Obispu nun llee los periódicos, nin deben llega-y les circulares internes, porque creo que nun se pue ser más claru y contundente coles reformes entamaes. Dende’l tema de los homosexuales, los divorciaos, la muyer na Ilesia, el celibatu, la reforma de la Curia a la que yá-y metió tisories, etc. etc. ¿Too eso nun ye novedoso? ¿Ye superficial? Nun sé en qué aparará tou esti cambiu que ta aniciando Francisco, pero’l nuestru queríu Obispu va a terminar como pasó con Xuanín XXIII, en que los más retrógrados punxéronse a rezar «pola salvación de la so alma». Y eso que ye too superficial…