Métense ente nós, furen y aprovechen los calces democráticos que tanto costó conseguir -sangre, y nun ye una metáfora- p’arrastriar a los paises a una deriva totalitaria y populista. A un caos, o seya una desorganización civil, nel que busquen beneficios. Beneficios del tipu que seya: de dineru, de poder, de popularidá… o de toos ellos xuntos. Y fáenlo cola connivencia d’esos calces qu’enantes dicía, y coles persones que los utilicen de bona o mala fe. Pueden ser los propios partíos políticos tradicionales, que con tal de ver ganar a un que va baxo la so bandera son capaces d’aupalu hasta lo más alto, anque conozan la calaña del individuu (como ye’l casu del Partíu Republicanu estadounidense con Trump), o puede ser aprovechando otros calces sociales y políticos como los medios de comunicación (prensa, televisión y agora cada vuelta más Facebook, Twiter, Instagram…) sumándo-y una montonera de perres p’aplanar el camín. Esos personaxes que, cola sida d’iguar los defeutos de la democracia, que los tien y munchos, lo que pretenden ye sustituila por un réximen personalista y totalitariu que diz tratar direutamente «col pueblu». Ensin intermediarios. Lo que pasa ye qu’esi pueblu, individualizáu, disgregáu, atentu namás a los mensaxes del «xefe» ye facilmente manipulable.
Cada vuelta más vemos como esos personaxes, esa xente peligroso, van apoderándose de los resortes del poder en tol mundu. Abasta con facer un repás a los actuales dirixentes mundiales y veremos como la perda de democracia ye una constante nos caberos años. Namás unos pocos paises, en parte de la vieya Europa (solo en parte), aguanten malamente ensin cayer nesos populismos totalitarios.
Los EE.XX pasaron por ser una de les cunes de la democracia, y seguro qu’asina fue nun principiu. Pero siempre atenta, como la utre, al so porgüeyu o meyor, al porgüeyu de les sos multinacionales y de los lobbies de les armes. De toos son conocíes les sos intervenciones en Latinoamérica, quitando y poniendo presidentes, dando palmaes o castigando a los amigos o enemigos, supuestos o verdaderos. Lo mesmo n’Oriente Mediu onde sofiten a unos rexímenes dafechamente repulsivos a los que tienen como aliaos.
Hai que tener, entós, munchu cuidáu con esos dirixentes políticos y con esos partíos que, col so afán de garrar el poder, nun tienen escrúpulos n’utilizar cualquier mediu (la esaxeracion, la mentira…) p’acabar colos rivales del mou que fuere. Y tamién con esos «palmeros» que, dende los medios públicos, los animen a ello ensin medir el resultáu al que nos pueden llevar. Lo que ta pasando estos díes en EE.XX yera impensable va mui pocu tiempu… pero ehí está.
