Tengo que dicir, de mano, que debo ser l’únicu español que nun vio’l programa de Jordi Évole, de magar los encesos comentarios, en tolos sentíos, que ta llevantando. Quiciás, por ello, puedo caltener un tonu de neutralidá que la so visión torgó: unos sintiéronse burllaos (un sentimientu que te fai reaicionar a la escontra) y otros aplaudieron porque, o bien entendieron aína la broma, o ensin entendela, agora dicen que la entendieron y eso da-yos un ciertu tonu de superioridá sobre los que “tragaron”. Yo seguramente taría ente los que “tragaron”, porque avezo a ser mui crédulu cola xente que me da confianza.
Y esi ye, quiciás, el puntu que m’abulta más criticable del ”esperimentu Évole”: la perda de confianza nes poques persones que, nesti mundu contamináu y corruptu, la merecen. Y ye qu’agora, cuando me siente a ver un programa de denuncia social, política o económica del señor Évole (o de cualisquier otru), nun voi dexar d’entrugame: “Esto será verdá o será un montaxe”. Esta xente tan seria que me lo cuenta, ¿nun tará tomándome’l pelo? Y too esto ye peligroso pa la denuncia, per un llau, y pa la credibilidá per otru. Pa los españoles, pa los que vivimos aquel día pegaos a los transistores y sintiendo na Tele marches militares, una broma d’esti calter nun resulta mui prestosa. Porque esi ye’l segundu aspeutu negativu que yo destacaría del asuntu: el tema tratáu.
Quieren comparar esti programa con otru que ficieron los franceses, qu’afirmaba que lo del viaxe a la Lluna de los americanos fuere una engañifa, un montaxe. Tien gracia, pero sobre too porque ye dalgo que nun te toca nenguna “fibra sensible”. Ye un tema popular, importante, y que se prestaría a ello, pero nel que tu nun tas implicáu emocionalmente. El 23 F nun ye lo mesmo, polo menos pa los que lo vivimos en primer persona. Porque, amás, yo soi de los que pienso que sí ye verdá que nesi tema nun ta too dicho. Qu’hai bastantes coses ciertes que descubrir, coses qu’agora pierden sentíu al facer una broma sobre too ello. Nesti momentu yá resulta un tema “quemáu” pal futuru.
Termino. Ye bono bromiar sobre los temes serios pa quita-yos solemnidá, y ye bono cuestionar la credibilidá de la xente pa colos medios de comunicación, pero hai que saber escoyer mui bien los fines y los medios pa nun llograr l’efeutu contrariu: la banalización de too, y la perda de confianza nes poques persones nes que podemos creyer. Pon-yos a los xudios un documental falsu, calteniendo que lo del Holocaustu fue un montaxe, verás que gracia-yos fai.
