Abúltame que ye la primer vez que los grupos d’oposición nel Ayuntamientu de Xixón voten xuntos pa sacar dalgo alantre. Nesti casu, la unanimidá opositora sirve pa echar al responsable del Festival de Cine de Xixón y, al empar, cambiar el sistema d’eleición del cargu, que pasará de ser un puestu de confianza del gobiernu municipal de turnu, a ser contratáu por concursu de méritos. El motivu que llevó a los partíos opositores a pautar esi cambiu fue’l desfase presupuestariu habíu, nos resultaos que se presentaron esti añu pasáu 2015. Un desfase qu’algamó, en dos años, na menos que 636.000 euros, una cantidá que nun ye refugaya.
A min nun me paez mal que s’acoten los puestos llamaos de «confianza», col nomamientu de persones salíes de concursos de méritos, pero dame un poco «mala espina» que s’empiece precisamente por ésti. Un puestu mui controvertíu dende que l’actual gobiernu municipal cambiare, con tol derechu del mundu (lo que nun quier dicir aciertu) al anterior direutor del certame, don José Luis Cienfuegos, pol presente -hasta agora- don Nacho Carballo. Da la impresión (dámela a min) qu’había ganes per parte dellos grupos opositores de tomase la revancha del anterior relevu, utilizando l’artillería que tan graciosamente acaben de da-yos los responsables culturales foristes. Y eso que nun tamos falando de desfalcos, falta de xustificación de pagos o factures falses, sinón de que’l presupuestu calculáu pa esti últimu añu se quedó mui curtiu. Nun se pue falar, creo yo, de despilfarru, puesto que’l festival xixonés sigue siendo’l más baratu de tolos festivales españoles, el de menor presupuestu, sinón d’un mal cálculu anticipáu de lo que diba a entrar y lo que diba a salir de les arques municipales. Y entrar entró muncho menos, sobre too porque esi Principáu d’Asturies tan amigu de Xixón, quitó’l 60% de lo qu’aportaba, y esa asturianísima Caxa d’Aforros, o como coño se llame agora, fizo satamente lo mesmo. Más lo que costó reabrir los Cines Centro que llevaben yá tiempu zarraos. Nun importa, de xuro qu’hubo tiempu pa rectificalo a la baxa, anque se quedare mal con coses de les que yá taben contrataes con anterioridá. Hubo un fallu de cálculu, gordu, y hai que lo pagar.
Ensin embargu, lo que más m’amola del tema ye que, en viendo esta rapidez y esta «finura» a la hora de cortar pelo
sano, paez suxerir que, hasta agora, les coses se tuvieren llevao de mou esquisitu colos anteriores mandatarios, ye dicir el PSOE, cola collaboración siempre inestimable de’Izquierda Xunida. Lo qu’ocurre ye que fue tolo contrario. L’anterior direutor, puestu tamién a deu pol gobiernu municipal d’entós, ye dicir, ensin concursu de méritos, tuvo trabayando durante ocho años ensin contratu nin nada asemeyao, pagábense-y les factures con cinco años de retrasu, trapicheó -el señor Cienfuegos- pa rexistrar la marca del festival FICX a nome suyu, y cuando los nuevos munícipes lu quitaron por perda de confianza, hubo que paga-y más de 100.000 euros d’indemnización por tola chapuza entamada polos qu’agora se ponen mui «puritos».
Con too esto, lo que queda pal futuru ye una entelequia. Va a pasase de batir records de películes y d’asistencia d’espeutadores, a un conatu de festival nel que van a amenguar les sales de proyeución, los ciclos paralelos, les publicaciones y la duración del festival. D’ehí a la esapaición, un pequeñu pasu. Quedarán mui contentos nel Principáu d’Asturies y na Caxa d’Aforros, o como coño se llame agora. Y dende llueu, el que se faiga cargu agora de les cenices, va a ser elexíu democráticamente, non como nos 53 años anteriores.
