Una de les carauterístiques del llamáu «islamismu políticu» ye l’oxetivu de construyir un estáu surdíu d’una llexitimidá divina. O dicho d’un mou más cenciellu: la política tien de tar sofitada nel Coran y ésti ye’l que debe dar les normes aplicables a la sociedá y a la política. Dende esi puntu de vista, l’intentu del actual ministru de (in)xusticia, Alberto Ruiz-Gallardón de suprimir una de les causes de la posibilidá d’albortar, la de la «malformación del fetu», ye un intentu d’islamizar la política española.
Ye ésti un tema mui delicáu, sobre too pa ser tratao polos paisanos, porque nenguna muyer pasa por él allegremente. Tolo contrario, siempre, y repito siempre, ye un trauma tan grande que na mayoría de los casos nun s’escaez nunca. Poro, nenguna demagoxa al respective. Pero ún nun pue menos qu’ablucar ante la sarta de tonteríes del señor ministru, pa xustificar un recorte nun de los casos más llóxicos d’albuertu, quiciás el que más, porque trayer voluntariamente al mundu a un ser pa que sufra -elli, la familia, los cuidadores…- nun tien xacíu, como mui bien diz el neurociruxanu infantil Javier Esparza nuna «carta abierta» nel diariu El País, dafechamente demoledora. http://sociedad.elpais.com/sociedad/2012/07/24/actualidad/1343153808_906956.html.
Recuerdo que mio suegra (que en paz tea) siempre dicía, n’época d’eleiciones, que quería votar a Gallardón, y cuando-y
desplicábemos que yera imposible porque nun se presentaba por Asturies, finaba diciendo que yera igual, qu’ella quería votar por Gallardón, mentanto asoleyaba una sorrisa pícara. Y ye que Gallardón, amás de «curiosu» (nel sen asturianu de la pallabra), paecía una persona moderada y moderna, anque una vez dalguién-y dixo nel parllamentu que comparáu con so padre, yera un facha.
Allégrome de que mio suegra nun pueda ver en qué se camudó aquel Gallardón al qu’ella quedría votar, porque ésti que s’arrastria peles sales del ministeriu ye una mala solombra d’aquel rapaz conservador, pero modernu y moderáu. Una solombra, un «doble» (y equí daría pa un cuentu de Borges) que ta tratando de gobernar cola Biblia, pa contentar a Rouco Varela, a la Xerarquía Católica y a la estaya más retrógrada del Partíu Popular. Yo respeto la opinión del señor «doble» en materia de creyencies relixoses. Caún pue tener les suyes o, como ye’l mio casu, nenguna. Pero lo que nun se pue almitir ye qu’eses creyencies personales ya íntimes, tengan que ser d’obligáu cumplimientu por toos. Que ye precisamente lo que quier facer el señor ministru.
