Pasaron yá unos díes dende les caberes pallabres del conceyal Rubiera que, como ye davezu, llevantaron una escandalera na llamada «opinión pública» asturiana. Una opinión pública compuesta por xente que nun comparte (compartimos) les salides extemporánees de Rubiera, y tamién por otra parte que se dediquen, como determinaos medios de comunicación, a xugar, como yá dixi n’otra ocasión, al «pim-pam-pum» col conceyal xixonés.
D’estes últimes declaraciones nun hai que dicir que resultaron una «metedura de pata», porque’l mesmu Rubiera s’encargó de pidir perdón polos escesos que pudieron suponer, y el mal llugar en que dexaba a una profesión tan mitificada como ye la minería. Porque los mineros, n’Asturies, son dalgo más qu’unos trabayadores profesionales d’una rama industrial. Son esos seres que representen a la llucha pela llibertá, a la resistencia a la dictadura, a la «revolución», cualquiera que seya’l sentíu que-y queramos dar a esta pallabra. Falar de los mineros ye falar de solidaridá, d’hermandá, d’inconformismu de, como diría’l mio admiráu Manfer de la Llera, «esos héroes anónimos«, d’esa «raza perbrava qu’afuraca montes al son de la dinamita«. ¿Cómo atrevese, entós, a criticar a la mina como fizo Rubiera y, amás, de mou gratuítu, pues nun venía a cuentu?
Y, ensin embargu, parte de lo que dixo Rubiera, dicho d’otru mou y quiciás n’otru contestu, nun ye nuevo, yá se dixo munches veces. Porque ye verdá qu’esiste, y asina lo denunciaron los propios sindicatos agrícoles, un abandonu vergoñosu del campu asturianu. Una falta de regulación, de sofitu, d’inversión, de planificación. Y nun ye mentira lo qu’asocede, por exemplu, nel casu la mazana y la sidra que citaba’l propiu Rubiera. Per otru llau, tampoco nun ye nuevo que nel tema de la minería, dende va yá munchos años, invirtiéronse miles de millones del dineru de la Comunidá Europea, nuna riestra de planes y de fondos mineros, cuyu sentíu yera preparar a los conceyos mineros y a los propios trabayadores pa cuando les mines, na so mayor parte, zarraren. Yo nun sé mui bien en que s’invirtieron eses perres, seguro que en coses útiles, pero nun paez que fueren empobinaes al destín pal que taben pensaes, sinón la situación agora nun sedría la que ye.
El delitu de Rubiera ye, entós, el de siempre. Piérdenlu les formes, la manera de dicir les coses que suel resultar
ofensiva, lo cual nuna persona pública ye un gran fallu. Pero en toa esta historia paez que fue’l propiu Rubiera’l que fizo zarrar les mines, cuando los responsables, con razón o ensin ella, fueron otros. Los qu’aprobaron en Bruseles la fin de les mines, con feches concretes, fueron los socialistes europeos, españoles incluyíos, y agora lo que pasa ye que tán cumplíéndose aquelles decisiones. Paez, inclusive, que fueron los propios Populares los que retrasaron dalgo esi zarru. Entós, yo entiendo que l’Asociación de Vecinos de Vega-La Camocha tea mui enfadada, y que lo pague con Rubiera pola so falta de tactu, pero’l casu ye que la Mina la Camocha ta agora zarrada y nun fue él el que la zarró, fueron otros.
Creo que Carlos Rubiera debería midir meyor les sos pallabres y asina nun tener que pidir disculpes cada poco. Nun servidor públicu eso nun ye de recibu. Pero tampoco se pue tar, como fai dalgún mediu de comunicación, permanentemente atacando a un representante del pueblu de Xixón, tirando por ellevación escontra’l so xefe. Hai que procurar xulgar el valir de les pallabres, non el del ecu. Porque l’ecu suel ser la pallabra, distorsionada.