«Nació con el don de la risa y la sensación de que el mundo estaba loco…» Ésti ye’l guapísimu entamu de la novela de Rafael Sabatini «Scaramouche», l’aventureru que llucha por vengar la muerte d’un amigu. «Scaramouche» ye tamién un personaxe de la Comedia Francesa, tipificáu como’l «Capitán». Ya igualmente hai una mui prestosa película de George Sidney qu’interpretó’l gran Stewart Granger recomendable pa los que nagüen pol cine d’aventures. Con esti atrautivu títulu principió nel Teatru Xovellanos el primer conciertu d’abonu de la Sociedá Filarmónica de Xixón.
La idea yera un conciertu de cámara interpretáu pol grupu «Forma Antiqua», un proyeutu de los llangreanos hermanos Zapico (Aarón, Daniel y Pablo) que tien ganada yá fama internacional. Pente medies, una narradora dramatizada -Ana Villa con testos de Natalia Huarte- pretendía un percorríu pelos grandes maestros del Barrocu francés. Una pretensión dafechamente fallida porque los dichos testos, esllavazaos y ensin dala rellación colo qu’escuchabemos, en nengún momentu nos tresportaron al ambiente cortesanu de Versalles. Fueron más bien una estorbisa que separtaba al públicu de la música que se-y ufiertaba.
Y fue una llástima porque’l conxuntu instrumental «Forma Antiqua» sonó maraviosamente y fízonos esfrutar con esa música de cámara de los sieglos XVII y XVIII, con autores como Lully, Marais, Couperin o Leclair. Igual pa los que, como yo, nun somos mui entendíos en dicha música, vinieren bien unes cencielles desplicaciones de lo que nos taben ufiertando, en llugar de metese a dramatizar unos testos insípidos y descontestualizaos que nada nun aportaben. Con eso y con too, sólo pola guapísima música, sicasí un migayín repetitiva, y pola gran actuación de los músicos (ente los que m’atrevería modestamente a destacar al flautista Guillermo Peñalver y al percusionista David Mayoral) pagó la pena la presencia nel Xovellanos. Y agora a esperar los nuevos conciertos d’esta Filarmónica de Xixón que, de xuro, van danos grandes allegríes.
